Ol kalsa grup insait long Sepik i wok long redim ol yet nau long stap insait long namba 15 Sepik Wara Pukpuk Festival we bai kamap long 5 i go 8 Ogas, 2023.

Ol man i bin danis long namba 14 ‘Sepik River Crocodile & Arts Festival’ long las yia. POTO: PNGTPA.

Joseph Dawai i raitim

NAMBA 15 Sepik Wara Pukpuk na At festival bai kamap long 5 i go inap 8 Ogas, 2023 na 30 kalsa grup i redi long soim pasin tumbuna bilong ol. Dispela festival i bin rejista aninit long Nesenel Kalsa Komisin (NCC) na ol i kisim setifiket long las wik Fraide wantaim K10, 000 sapot mani.

Wanpela teknikel tim bai helpim long stretim kalsa na lukautim ol long taim bilong so.

Festival seketeri, Jacob Marek, i tok dispela so em impoten na bai bungim ol komyuniti bilong Sepik wara long strongim kalsa na mekim ol yangpela i kamapim pasin tumbu­na long dispela so.

“Dispela so i bin stat wantaim 25 grup na i go antap long 35 long nam­ba 10 amamas de na planti ol pipel long bus, ailan na nambis i bin ka­map,” em i tok.

Turis Ats na Kalsa Minista, Isi Henry Leonard, i tok dispela so bi­long pukpuk insait long Sepik em i mekim dispela so impoten.

“Pukpuk em i save stap long wara na ol pipel bilong Sepik i gat stori wantaim bilip bilong em wantaim olsem na bai ol yangpela inap lainim long en na bai ol i no inap lusim dis­pela pasin bilong stap wantaim spirit bilong pukpuk.

“Ol pipel i gat naispela kalsa inap long mekim planti samting long en tasol mipela olgeta i mas wok bung wantaim long strongim na kamapim sampela rot.

“Wok bilongTuris Promosen Ator­iti (TPA) i bilong divelopim turis na ol pipel i ken go bek long kalsa na save astingting we ol i mas tokaut o lusim i stap hait wantaim ol yet,” em i tok.

Mista Leonard i tok wanem sam­ting ol pipel i save yusim olgeta taim long laip bilong ol na long ol Sepik pipel pukpuk em i hap bilong laip bi­long ol.

“Sepik pukpuk em i hap bilong laip bilong ol pipel na i mas i gat rot bilong sapotim TPA na yumi ken bringim dispela kalsa i go long nara­pela level,” Mista Leonard i tok.

PINIS.