Wanpela nupela faktori bilong mekim kopi bai sanap nau long Pomio distrik. Dispela bai lukim ol fama long hap i stretim na redim ol kopi prodak bilong ol bipo long ol i salim go aut long ol arapela senta na kantri tu.

Pomio bai nap long stretim na redim kopi bipo long ol i salim i go aut.

OL kopi groa long Pomio, Is Nu Brit­en, bai gat wanpela faktori bilong ol yet.

Pomio i save groim moa kopi long ol arapela ples insait long Is Nu Brit­en.

Nau yet ol i save salim kopi go long bikples bihain long faktrori long Kabakaul i pas bihain long menesa i bin dai.

Pomio Distrik Divelopmen Atoriti wantaim bod bilong en i bin wokbung long kamapim wanpela faktori long Palmalmal, hetkwata bilong Pomio distrik.

Memba bilong Pomio na Siaman bi­long DDA bod, Elias Kapavore i bin go long Jiwaka provins na bungim papa bilong wanpela faktori ol i bin sanapim tasol i no yusim.

Em i baim dispela faktori na ol material long K700,000 long dispela bisnisman long Banz na bai kisim i go long Pomio.

Em i tok ol i givim mani pinis long wanpela sip kampani long karim 8-pela kontena i gat ol material bilong faktori i go daun long Lae.

Dispela sip kampani bai karim tu ol material bilong sanapim ol bris long distrik.

Mista Kapavore i tok em i bin go long Banz tupela mun i go pinis na DDA i kisim kopi manesa bilong Ki­kiba plantesin long helpim ol long sanapim dispela faktori long Palmal­mal.

“Mipela i gat planti kopi ol fama long Pakia, Mile na Aona wod long Pomio LLG i save bringim i go long faktori long Kabakaul bipo.

Bihain long hevi i kamap, Pomio DDA i pa­sim tok long sanapim faktori bilong mipela yet,” Mista Kapavore i tok.

Ol i wetim MV Pomio i stap long sevis, olsem na ol i kisim wanpela narapela sip long karim ol bek kopi go long Lae aninit long wokbung wantaim Coffee Industry Corporation (CIC) na arapela praivet wokbung.

Mista Kapavore i tok ol i wok klos­tu wantaim CIC long sanapim dispela faktori long Pomio.

PINIS.