Ol famili bilong ol lain husat i bin lus long taim bilong bikpela pait long Bogenvil o ‘Bougainville Con­flict’ bai stat long kisim infomesen na save long stori bilong ol famili memba bilong ol taim opis bilong ol lain i lus i op long Bogenvil.

Hetman bilong ICRC long PNG, Georgios Georgantas (lephan) na ABG Atoni Jeneral na Minista bilong Bogen­vil Independens Misin Implementesen, Ezekiel Masatt (raithan) i katim ribon long opim nupela opis bilong ol lain i bin lus long Bogenvil Conflict. POTO: ICRC.

OL famili bilong ol lain husat i bin lus long taim bilong ‘Bougainville Con­flict’ bai stat long kisim infomesen na save long stori bilong ol famili memba bilong ol taim opis bilong ol lain i lus i op long Bogenvil.

Atonomas Bogenvil Gavman (ABG) i go pas long kamapim dispela opis, na Intenesenel Komiti bilong Red Kros (ICRC) bai givim teknikel sapot.

Dispela opis bai givim bel isi long ol famili memba na ol manmeri bilong Bogenvil, na bai inap long givim info­mesen long ol askim bilong ol manmeri long hevi we i bin kamap long 1988 i kam long 1998.

ICRC i sapotim ABG long kamapim dispela opis aninit long lukluk bilong ol long lukautim olgeta manmeri na raits bilong ol long save long wanem sam­ting bai kamap, na wanem samting i bin kamap.

Dispela opis i bin op long 29 Jun long Buka, na ABG Atoni Jeneral na Minista bilong Bogenvil Independens Misin Implementesen, Ezekiel Masatt i go pas long opim.

Mista Masatt i tok dispela opis bai no inap lukluk long kisim tasol bun bilong ol lain i dai pinis, tasol opis bai lukluk tu long givim kaunseling long ol lain husat i bungim sampela kain hevi long laip bilong ol taim ol i stap na lukim hevi i bin kamap.

‘Yumi gat kalsa bilong yumi long lu­kautim gut ol lain husat i dai pinis.

“Sapos yumi no lukautim gut dispe­la, bai yumi no inap stap gut.

“Olsem na mi promis long givim ol­geta luksave long wok bilong dispela opis long olgeta hap bilong Bogenvil,” Mista Masatt i tok.

Hetman bilong ICRC long PNG, Georgios Georgantas i amamas long ABG i kamapim dispela opis, na em i toktok strong long wokbung wantaim ol long kamapim wok long olgeta hap bilong Bogenvil.

Mista Gerogantas i amamas tu long lukim sapot bilong ol lokal atoriti na olgeta manmeri bilong Bogenvil.

Em i tok dispela kain sapot na bel kirap long wok bai mekim wok bilong ICRC na ABG i kamap isi long pinisim gut wanem wok ol bai mekim.

PINIS. //