Gran i bruk na kilim 6-pela manmeri long Kumbruf long Madang provins taim ol i bin go kemp long painim gol.

 James G. Kila i raitim

OL pipel long Kumbruf long Madang provins i stap wantaim bikpela sori nau bihain long graun i bruk na karamapim 6-pela lain long hap.

Kumbruf i stap long Simbai lokal level gavman (LLG) long Midel-Ramu distrik.

Ol dispela lain i bin slip insait long wanpela kemp haus taim graun i bruk na karamapim ol i dai.

Dispela 6-pela lain em wanpela praimeri skul sumatin, tupela meri na tripela bikman husat ol i bin go wokim kemp na wok long painim gol.

Komyuniti lida bilong Kovon, Eli­jah Kas, husat i bringim ripot i go long Madang, i tokaut olsem ol i bin 8-pela na ol i kam long narapela eria long Banga.

Ol i bin go long Kumbruf long wokim kemp na painim gol.

Em i tok tupela bilong ol i orait long wanem ol i stap longwe liklik long eria ol wantok bilong ol i wokim kemp na slip.

Ol i harim tasol pairap bilong graun na ol i ranawe.

Dispela eria long Kumbruf em ples we planti lokal lain i save go painim ‘al­luvial’ o das gol.

Planti taim ol i save kisim gol das na tu naget na karim i go salim long Hagen na Goroka we i gat ol lain bilong baim gol i stap.

Mista Kas i tok em i bringim ripot bilong dispela 6-pela i go long Madang long toksave long Provinsal Disasta Opis tasol taim em i kamap long hap em i painimaut olsem opis i pas.

PINIS. //