Nupela poto i kamaut long Opis bilong King Charles i soim em wantaim pikinini man na tumbuna bilong em wantiam olgeta bilas bilong ol.

OPIS bilong King Charles lll i putim aut ol opisa poto bilong nupela king na namba wan pikinini man na namba wan tumbuna man bilong em. Ol i bin kisim ol dispela poto bihain tasol long koronesen bilong King Charles.

Ol i bin putim aut tu poto bilong King Charles wantaim meri bilong em, Kwin Camilla, long las wik.

Poto i soim King Charles i putim bilas bilong king na i sindaun long sia king bilong em. Prins William i sanap long laphan na Prins George i sanap long raithan bilong em. Aninit long lo bilong ol tude, long taim King Charles i dai bai Prins William i kamap king na bihain long em bai Prins Geooge i kisim ples bilong em.

Royal potograpa, Hugo Burnand i bin kisim ol dispela poto. Em i bin kisim poto bilong King Charles na Kwin Camilla long taim tupela i bin marit.

PINIS.