Planti hevi bilong lo na oda long Haus Guria long Rabaut i mekim Dipatmen bilong Mineral Policy na Geohazard Management i stopim ol pablik long raun nabaut i go long hap.

MAUNTEN PAIA: Mt. Tavurvur i pairap. POTO: AFP.

Anna Solomon i raitim

DIPATMEN bilong Mineral Policy na Geohazard Management i stopim ol pablik long raun nabaut i go long Haus Guria long Rabaul Hilltop bihain long planti hevi bilong lo na oda i kamap.

Seketeri bilong Dipatmen, Harry Kore, i putim wanpela pablik notis long ol niuspepa long dispea wik. Dispela notis i tok ol kriminal i brukim i go insait na stilim o bagarapim ol ikwipmen bilong was long ol volkeno, na ol i bin paitim wanpela wokman na famili bilong em long Rabaul Volkenolojikal Obsevetori (RVO).

Mista Kore i tok Dipatmen i egensim tru pasin ol kriminal i bin mekim long family bilong wanpela sinia opisa long Rabaul Volkeno Obsevetori brens long Sarere 8 Epril long taim bilong Ista.

Em i tok dispela pasin bilong brukim haus i go insait na paitim sinia volkkenolojis insait long banis bilong RVO em i rabis pasin tru, bikos ol dispela pablik sevan i save mekim bikpela wok tru long lukautim laip bilong ol pipel. Ol i givim bikpela sevis long was long ol volkeno long hap bilong Is Nu Briten Provins.

Mista Kore i tok ol i bin putim ripot long Rabaul Polis na askim polis long sekap long dispela trabel. Dipatmeni hop ol polis bai arestim ol lain i mekim dispela kriminal pasin na kisim ol go long han bilong lo.

Mista Kore i singaut tu long ol lida bilong ol komyuniti i stap klostu, ol papamama, yut, lain wanpisin, viles na sios long lukautim ol dispela propeti bilong gavman.

Em i tok ol komyuniti lida, polis, provinsal edministresen, na ol lokal memba bilong Palamen i mas luksave long dispela hevi bilong lo na oda na painim rot bilong stopim.

Dipatmen i tok ol RVO opisa i save putim laip bilong ol long mak nogut long taim ol i go antap long sekap long ol volkeno o long taim ol i go klostu long mekim inspeksen. Ol i mekim dispela wok long lukim olsem laip bilong ol pipel long Rabaul bai i stap seif olgeta taim.

Dipatmen na Haus Guria (RVO Brens) i gat longpela histori wantaim ol pipel bilong Is Nu Briten Provins. Olsem na bai em i no inap pasim maus long taim ol kriminal i mekim pasin nogut long wanpela opisa na famili bilong em.

Narapela bikpela hevi Dipatmen i bungim nau em pasin bilong ol kriminal i brukim na stilim ol ikwipmen long ol monitoring stesin long las 5-pela yia.

Mista Kore i tok las stesin ol i bin brukim na stilim ol ikwipmen em long BMA antap long seksen bilong Burma Rot. Bikos long dispela, ol ki monitoring stesin long Tavurvur na Vulcan i no inap kisim na salim signel.

Dipatmen i tok dispela i mak nogut bikos ol bai i no inap save sapos volkeno bai pairap o nogat.

Mista Kore i askim ol pipel bilong Is Nu Briten na ol arapela provins we i gat ol monitoring stesin long lukautim gut ol dispela stesin bikos ol i mekim wok bilong protektim laip bilong ol pipel.

PINIS.