Gavman bilong Papua Niugini makim 21 Me 2023 olsem De bilong Sikau bilong Diwai o 'World Tree Kangaroo Day', olsem wanpela rot bilong givim luksave long lukautim dispela animel we i stap long ailan bilong Niugini tasol.

STAP LONG LUKAUT: Sikau bilong Diwai. POTO: Mandy Glass/MAF.

GAVMAN bilong Papua Niugini i makim 21 Me 2023, olsem De bilong Sikau bilong Diwai o World Tree Kangaroo Day.

Dispela i namba wan taim long Nesenel Ekseketiv Kaunsil (NEC) i givim kain luksave olsem.

Minsta bilong Envairomen, Konsevesen na Klaimet Senis, Simo Kilepa, i tok dispela Tree kangaroo Day tu em i taim bilong tingim tu ol arapela wail enimal na protektim ol long ples we i save stap long en.

Gavana bilong Nesenel Kepital Distrik, Powes Parkop, i tok em i wok bilong olgeta pipel bilong PNG nau long selebretim World Tree Kangaroo Day long olgeta yia na mekim ol arapela kantri long wol tu long luksave long dispela de.

Las yia, 44 ogenaisesen long 11-pela kantri i bin sapotim na selebretim tingting bilong makim dispela de bilong tingim ol sikau bilong diwai long taim nius i raun long sosel midia na 16 zoo long wol i putim ol so long selebretim ol sikau bilong diwai.

I gat 14 spisis bilong ol sikau bilong diwai i stap long ailan bilong Niugini na liklik kona bilong noten Australia na PNG i gat 9-pela bilong ol dispela spisis.

Hap namba bilong ol sikau bilong diwai i stap long mak nogut we klostu bai olgeta i lus nau. Bikpela birua bilong ol sikau bilong diwai long PNG em ol man i kilim ol na taim ol i katim daun ol bikbus long kisim timba.

PNG Konsevesen na Envairomen Atoriti i bung wantaim United Nations Development Program na kamapim PNG Biodiversity and Climate Change Fund for Protected Areas Financing.

Dispela program bai kisim mani long ol intenesenel ogenaisesen long givim ol lokal komyuniti long helpim wok bilong was long ol Protected Area long PNG.

PINIS.