PNG gavman lukluk long pinisim olgeta dinau bilong kantri long 2034.

Carolyne Ketsimur i raitim

PNG Gavman i gat plen long baim olgeta dinau bilong kantri long yia 2034.

Tresera Ian Ling-Stuckey i bin mekim dispela tok long 56 ADB enuel bung.

Em i tok wok bilong stretim baset ‘Budget repair’ i wok long kamap gut na i wok long go daun.

'Final Budget Outcome' (FBO) bilong 2022 i kamaut pinis na i soim olsem baset i go daun long K5,851.8 milien o 5.4 pesen bilong GDP. Dispela baset em i daunbilo long baset bilong 2020 we i bin 8.6 pesen na 6.7 pesen long 2021.

Em i go daun tu long saplimentri baset bilong 2022 we i bin 5.6 pesen.

Tresera Ling-Stuckey tok kantri stap long rait rot bilong daunim baset bilong en na i lukluk long mekim moa mani.

Long 2027 gavman bai stat long mekim moa mani bilong kantri na olgeta dinau bai pinis long 2034.

Mista Ling-Stuckey i tok taim nupela gavman i kam insait long 2027, ol bai bihainim wankain rot tasol long gohet long daunim baset.

Em i tok gavman i wok long stretim ol hevi bilong baset we olpela edministresen i bin lusim.

Marape-Rosso gavman i wok long bihainim gut ’13 year Budget Repair’ plen bilong en na bai stap olsem long ol yia i kam.

PINIS.