Planti manmeri, lida nao l grup i singaut long Justin Tkatchenko long risain olsem Memba bilong Palamen na tu long gavman long rausim em long kantri.

BEL HEVI BILONG KANTRI: Mista Tkatchenko i tok sori long toktok bilong em na tu i tokaut olsem em i lusim wok olsem Foren Afeas Minista long las wik Fraide Me 12, 2023. POTO: A. Molen/ Wantok.

 Andrew Molen i raitim

JUSTIN Tkatchenko i tokaut pinis olsem em i lusim wok olsem Foren Afeas Minista bilong Papua Niugini tasol planti manmeri singaut yet long em i mas risain olgeta.

Sampela i laikim bai gavman i rausim em olgeta olsem Memba bilong Palamen na raus long kantri.

Dispela hevi kamap bihain long Mista Tkatchenko i tok long wanpela nius ripot bilong ABC olsem ol Papua Niugini manmeri em ol “useless people” (i no gat save na tingting) na “primitive animals” (bus kanaka na enimal).

Mista Tkatchenko i tok sori long ol dispela toktok em i mekim, na em i tok klia olsem em sutim dispela toktok i go long ol lain husat i wok long bagarapim pikinini meri bilong em, Savannah.

Savannah (Tkatchenko) i bin putim wanpela video bilong raun bilong em i go long London wantaim Mista Tkatchenko long koronesen bilong King Charles III long Me 6, 2023. Dispela video i soim em i raun long ol bikpela stua na baim planti samting we i kos bikpela mani tru, na dispela i mekim planti manmeri kros long em.

Siaman bilong ‘Permanent Parliamentary Committee on Foreign Affairs, International Trade, Immigrations and Defence’, Belden Namah i singaut long Mista Tkatchenko long risain olgeta olsem Minista na Memba bilong Palamen, na tu rausim em yet olsem sitisen bilong PNG. Mista Namah i tok tu olsem dispela video i no soim rispek long kantri na ol pipel bilong PNG.

Catholic Professionals Society of PNG (CPS PNG) tu i singaut long Praim Minista James Marape long rausim Mista Tkatchenko. Siaman bilong CPS PNG, Paul Harricknen i tok Mista Tkatchenko i bagarapim ol pipel na kantri na ol i no gat moa bilip long em.

“Praim Minista i no ken wetim Ombudsman Komisin na ol arapela wok painimaut bilong lo, em i mas rausim Tkatchenko long kabinet nau tasol,” Mista Harricknen i tok.

Wanpela protes mas i bin kamap long Mosbi long las wik Fraide 12 Me, we ol sumatin long University of PNG (UPNG) i bin singaut long Mista Tkatchenko long risain.

Mista Tkatchenko i no moa holim wok olsem Minista bilong Foren Afeas tasol em i stap long gavman yet olsem Minista. Dispela wok nau bai stap long han bilong Mista Marape inap ol i makim narapela man long holim.

Mista Tkatchenko i lusim wok wanpela wik bipo long ol lida bilong ol arapela kantri kam long FIPIC bung long Mosbi.

PINIS.