Presiden bilong USA, Joe Biden bai no inap kam long PNG. Dispela em long wanem em bai stap long wanpela bung bilong Kongres long Amerika long stretim hevi bilong dinau na baset bilong ol.

NO INAP KAM: Presiden bilong USA, Joe Biden bai no inap kam long PNG. POTO: Victor Blue/Bloomberg/Getty Images/CNN.

Andrew Molen i raitim

Presiden bilong Amerika (USA), Joe Biden bai no inap kam long Papua Niugini.

Toksave i kam long ‘White House’ long Tunde dispela wik, i tok olsem dispela raun bilong Mista Biden i go long PNG na Australia nau bai no inap kamap.

As bilong dispela em long wanem Mista Biden bai go bek long Amerika long Sande bihain tasol long bung bilong G7. G7 bung bai kamap long Hiroshima long Japan long Me 19 i go 21, 2023.

Pres Seketari bilong White House, Karine Jean-Pierre i tok long wanpela stetmen olsem Mista Biden i toktok pinis wantaim Praim Minista Anthony Albanese bilong Australia na Praim Minista James Marape bilong PNG long dispela senis. Em i tok ol bai pasim tok long makim narapela taim bilong dispela raun. Mis Jean-Pierre i tok Mista Biden nau i lukfowet long go long bung long Hiroshima.

Taim em i go bek long USA bai em i bung wantaim ol memba bilong Kongres long stretim baset bilong kantri na tu lukluk long ol arapela hevi.

Dispela i min olsem em bai no gat inap taim long mekim dispela raun i kam long PNG na Australia.

Astingting bilong raun bilong Mista Biden long raun i kam long PNG na Australia long soim sapot bilong USA long Pasifik rijon. Biden inap kamap long Mosbi long neks wik Mande, Me 22.

Long wankain taim bai Praim Minista bilong New Zealand, Chris Hipkins, Praim Minista bilong Fiji, Sitiveni Rabuka na Praim Minista bilong India, Narendra Modi tu bai kam long PNG.

Ol lida bilong ol arapela kantri long Pasifik tu bai kam long dispela taim long stap insait long bung bilong ‘Forum for India-Pacific Islands Cooperation’ (FIPIC).

PNG gavman i kamapim planti wok redi pinis long kisim Mista Biden i kam tasol dispela bai no inap kamap nau.

PINIS. //