Praim Minista bilong PNG, James Marape bai opim namba wan bung bilong Spesel ikonomik zone we bai kamap long Mosbi Sande Me 7 i go 9, 2023.

Lina Garry i raitim

PRAIM Minista James Marape bai opim namba wan bung bilong Spesel ikonomik zone bung long Mosbi long Sande, 7 i go inap 9 Me.

Dispela bung em Dipatmen bilong Intenesenel Tred na Invesmen aninit long Minista bilong Intenesenel Tred na Invesmen i go pas long en. Ol i askim ol lida bilong ol arapela kantri na ol bikpela kampani long wol long kam na luksave long ol eria we i gutpela long wokim mani.

Mista Marape husat i bin go pas long toktok long Spesal ikonomik zone bai bungim ol lain husat bai kam long bung.

“Mi lukluku long harim ol lain husat i gat ekpiriens long dispela spesel ikonimik zone long wol we i kamap gut.

“Gavman bilong mi wok long toktok strong long dispela program taim mi kisim wok long 2019 na mi tok tenkyu long Mista Maru long hatwok bilong em long dispela bung.

“Long mun Mas taim mi bin go long Gabon long Africa, mi lukim olsem Spesel Ikonomik zone i senisim kantri bilong ol.

“Na dispela rot em mi wok long toktok long en taim mi kamap Praim MInista, long mekim downstream prosesing long kantri tu,” Mista Marape i tok.

Mista Marape i tok, taim em i save bung wantaim ol arapela wol lida, em i save tokim ol long kam na inves long PNG.

Mista Marape i tok, Spesel Ikonomik zone em bilong kamapim wok na helpim ikonomi long kamap long wanem dispela em tingting bilong gavman bilong em.

“Gavman i putim moa long K300 milien long 2023 baset bilong graun, egrikalsa, fiseri, ikwiti na SME divelopmen long sapotim dispela polisi bilong gavman.”

PINIS. //