Gavana bilong Madang, Ramsey Pariwa i laikim bai China i givim moa helpim long provins bilong em long sait bilong infrastraksa divelopmen bilong wanem ol i gat bikpela invesmen long Madang.

MADANG LUKSAVE: Embeseda bilong China, Zeng Fenhua i sanap wantaim Gavana bilong Madang, Ramsey Pariwa long opis bilong gavana long Madang Provinsal gavman. POTO: James G. Kila.

James G. Kila i raitim

GAVANA bilong Madang, Ramsey Pariwa i mekim strongpela askim i go long Embeseda bilong China i kam long PNG, Zeng Fenhua.

Mista Pariwa i askim long watpo China i no luksave long Madang provins long ol bikpela infrastraksa divelopmen na i lukluk tasol long kain ples olsem Mosbi.

Embeseda Zeng wantaim wanpela bisnis delegesen bilong China i bin go long Madang long las wik Tunde, Epril 25, long mekim wanpela ofisal lukluk raun long Ramu Nikel/kobalt main.

Ramu Nikel em bikpela maining invesmen bilong China long Madang provins.

Mista Pariwa i tok em i amamas long China i wok long kamapim planti ol wok long helpim PNG long sait long infrastraksa divelopmen, na tu em i amamas olsem ol China woklain i save hatwok tru na soim tru pasin bilong tuhat na holim graun na mekim wok long PNG.

Mista Pariwa i tok Madang i lukautim bikpela maining invesmen bilong China tasol planti ol bikpela infrastraksa helpim i kam long China i wok long go long ol arapela provins na Mosbi tasol.

PINIS. //

Westen Hailans provins i lukim foa-len rot i kamap long hap na tu ol arapela provins i wok long kisim helpim i kam long China, tasol long Madang yet em i no gat planti senis i kamap.

Gavana Pariwa i tok no gat narapela kantri long wol i gat bikpela invesmen long Madang wankain olsem China i gat wantaim Ramu nikel.

Olsem na em i askim gavman bilong China long luksave long Madang nau na helpim provins long kamapim sampela bikpela infrastraksa divelopmen.

Mista Pariwa i askim Embeseda Zeng tu long helpim Madang long wokim bris joinim Madang i go long Midel-Ramu distrik kalapim wara Ramu.

Em i tok Madang i luksave long China olsem wanpela divelopmen patna long helpim provins long divelop.

Mista Pariwa i tok strong olsem ol arapela provins long PNG i no gat kain bikpela invesmen bilong China i stap long ol tasol ol i wok long kisim ol bikpela infrastraksa divelopmen i kam long China, na dispela em i no fea tumas.

Embeseda Zeng i bekim olsem Embesi bilong China long PNG i no save makim wanem ol ples o provins long kantri long kirapim ol divelopmen wantaim mani helpim.

Em i tok klia olsem Gavman bilong PNG yet i save makim wanem provins long kantri long kirapim nupela divelopmen wantaim wanem mani helpim i kam long China.

PINIS.