Raun bilong Presiden bilong USA, Joe Biden i kam long PNG em i soim wanpela bikpela luksave na pasin rispek i kam long kantri na gavman i stap redi long welkam long em.

Lina Garry i raitim

PRESIDEN Joe Biden bilong US na Praim Minista Narendra Modi bilong India bai kam na bung wantaim ol arapela ol Pasifik ailan lida long PNG.

Praim Minista James Marape i tok PNG gavman i redi long kisim ol wol lida namel long dispela mun.

Em i tok ol i no tokaut yet long wanem ol het tok ol bai toktok long en long dispela bung tasol em i save olsem ol fores na solwara bilong PNG na Pasifik bai stap insait long dispela ol toktok.

“PNG em i redi long kisim Presiden Biden na Praim Minista Modi long wanem dispela em i namba wan taim tupela bikpela lida long wol bai kam long bikpela ailan kantri insait long Pasifik.

“Praim Minista Modi bai kam bung wantaim 18 Pasifik ailan lida long Indo-Pasifik toktok, na PNG na ol Pasifik bai no inap abrus.

“Yumi gat bikpela kabon main na bikpela solwara na spes long skai (o ‘air’ spes).

“Yumi lukim wankain hevi bilong klaimet we i wok long bagarapim laip bilong yumi na ikomoni tu.

“Mi amamas olsem long taim we Praim Minista bilong India bai kam, Presiden Biden bai kam tu long wankain taim long soim rispek bilong em long ol lida bilong Pasifik.

“Mi bin gat sans long toktok long Presiden Biden long New York na Washington na mi askim em long kam long PNG sapos em i gat taim.

“Na mi amamas olsem toktok bilong em long kam long PNG i karim kaikai nau,” Mista Marape i tok.

PINIS. //