Famili bilong Sinia Saiden Ludwig Dondo husat i lusim laip bilong em long Mande long ATS setelmen ausait long NCD i laik polis i mas holim ol lain husat i kilim papa bilong ol na mekim em pilim pen tu.

LUSIM PAPA: Meri na ol pikinini bilong Sinia Saiden Ludwig Dondo i gat bipela wari long papa bilong ol husat i dai dispela wik. POTO: L. Garry/ Wantok.

“Mi save olsem ol no inap long givim bek papa bilong mipela tasol jastis i mas kamap long dispela dai...” - Pikinini meri

 Lina Garry i raitim

MERI na pikinini bilong Sinia Saiden Ludwig Dondo husat i lusim laip bilong em long Mande long ATS setlemen ausait long NCD i laik polis i mas holim ol lain husat i kilim papa bilong ol na mekim em pilim pen tu.

Misis Miriam Dondo, meri bilong Mista Dondo i tokim Wantok Niuspepa olsem man bilong em husat i wok long Dog Yunit i bin kisim tupela las gels i go lusim long skul long moning.

Em i tok, ol i no bin lukim papa bilong ol o toktok long em. Em i stap long ples bilong wok na i kam long haus long kisim yuniform bilong em na tu, lukim tupela bubu bilong em.

“Taim em wokabaut kam insait, em i askim pikinini meri, Ludwina long yunifom bilong em na tu tok mi laik lukim tupela ‘boss’ bubu bilong mi na em i karim liklik pastaim long wanem liklik em wan nem bilong em.

“Em i givim bebi i go bek long Ludwina na karim narapela gen na tupela sindaun long kar go inap em i lusim em long veranda bilong haus na i draiv aut.

“Taim Ludwina i lukim em i go, em i singaut long em tasol em i no tanim, em i draiv i go tasol,” Misis Dondo i tok.

WANTAIM OL BUBU: Meri bilong Sinia Saiden Ludwig Dondo wantaim tupela pikinini bilong Ludwina Dondo (pikinini meri). POTO: L. Garry/ Wantok.

Mista Dondo i go bek long beis na kisim tupela memba bilong yunit na ol i go long wanpela wok long ATS we ol lain i wok long pait.

“Ol i kisim toksave long wanpela hevi long hap na ol i go long stretim na nogat. Papa bilong mipela i kisim spia long lep sait bros bilong em.

“Olsem na mi laikim tupela man husat i go wantaim em long stori gut na mipela harim.

“Mipela laik save sapos em yet i go insait long stopim pait o em i go wantaim tupela opisa?

“Na sapos ol i lukim ol sut long ston na ol bunara nabaut ol no laik sutim gan long rausim ol lain?

“Dai bilong papa bilong mipela i olsem wanem? Tupela las pikinini meri i no kaikai long asde kam nau.

“Em i gat ol pikinini meri tasol na wanpela mangi na ol i wari stret.

“Ol i save laikim papa bilong ol moa na dai bilong em i mekim ol i wari bikpela na mi no save tupela liklik ya bai wokim olsem wanem long skul bilong ol.

“Mipela wari na krai long wanem ol lain i no inap long givim bek papa bilong mipela,” Misis Dondo i tok.

“Mi laik tok tenkyu long Asisten Komisina bilong NCD na Sentral, Anthony Wagambie Jr long salim ol polisman hariap i go insait long ples we trabel i kamap long en,” Misis Dondo i tok.

Em i tok, nau yet ol i laikim ol polis i mas mekim wok painimaut na kalabusim ol lain kilim papa bilong ol na lukim olsem.

“Mi laikim polis long mekim wok bilong ol na arrestim.

“Mi save olsem ol no inap long givim bek papa bilong mipela tasol jastis i mas kamap long dispela dai,” Misis Dondo i tok.

PINIS. //