Presiden bilong Media Council of PNG (MCPNG) i singaut long ol manmeri, gavman na ol bisnis long givim bilip na sapot bilong ol long wok bilong media insait long PNG. Em i tok ol kain kain pasin na paul toktok bilong intanet na sosal media i no ken mekim ol i tingting kranki long wok tru bilong media.

SAPOTIM MEDIA: Presiden bilong MCPNG, Neville Choi singaut long olgeta manmeri long sapotim wok bilong ol tupela media insait long PNG. POTO: Media Development Initiative.

Andrew Molen i raitim

Wanpela bikpela wok bilong olgeta media ogenaisesen wantaim ol nius ripota insait long Papua Niugini em long winim bilip na sapot bilong ol pipel na gavman.

Dispela wok i mas kamap bai sistem bilong demokresi na gutpela wok gavanens i ken kamap strong insait long kantri.

Presiden bilong Media Council of PNG (MCPNG), Neville Choi tok planti kain nius na ol program long intanet na sosal media i kamap nau we i paulim tingting na lukluk bilong ol manmeri long wok tru bilong ol media o press.

Long dispela as MC PNG wantaim ol memba bilong en wantaim ol arapela patna i mas wokhat nau long winim bek dispela bilip na sapot long wok tru bilong ol.

Mista Choi bin toktok long wanpela bung bilong MC PNG long Lamana Hotel long Mosbi long Trinde, Me 3, 2023 long makim ‘International Media Freedom day’.

“Yumi no ken lusim bilip long wok tru na strong bilong media long divelopmen na gro bilong demokresi long kantri olsem yumi we i gat planti salens,” em i tok.

“Long gtupela bilong ol pikinini bilong yumi long bihain taim, yumi mas i gat media we em i fri na i ken mekim gut wok bilong en long stretpela na gutpela we.

“Em bai sanap strong long trupela tok na makim maus bilong ol pipel bilong yumi long komyuniti husat ol i no inap long kamaut na toktok,” Mista Choi tok.

UN Resident Coordinator, Richard Howard i tok dispela yia i makim 30 yia bilong dispela de we United Nations (UN) i bin makim stat long 1993.

Em i tok fridom bilong media olgeta hap long wol i wok long go daun bilong wanem ol ripota i wok long kisim ol pret toktok long pasim ol.

“World Press Freedom Day long dispela yia em i gutpela tu long tingim ol 430 jenelis husat ol i dai o go long kalabus long 2022 olgeta hap long wol,” Mista Howard i tok.

Em i tok fridom bilong media em i kam aninit long human rait tu bilong wanem em i save lukluk long strongim fridom bilong ol manmeri long toktok na soim tingting bilong ol klia long ol samting we i no gutpela long laip na sosaiti bilong ol.

Mista Howard i tok wok bilong ol jenelis em i no isi bilong wanem ol i no save kisim bikpela pei tasol ol i save mekim dispela wok long wanem ol i gat bilip long mekim senis long kantri bilong ol.

“Em i no isi wok, na dispela ol hevi bai no inap pinis yet tasol yupela i stap strong olsem na mipela long UN i tok tenkyu na mipela i sanap wantaim yupela,” Mista Howard i tok.

PINIS. //