Koronesen bilong King Charles III bai kamap dispela Sarere, Me 6, 2023 na em bai wanpela bikpela de insait long histri bilong Papua Niugini na ol arapela Komonwelt kantri.

KING: Koronesen bilong King Charles III bai kamap dispela Sarere long Westminster Abbey long London, England. Em bai kamap King bilong PNG na ol arapela realm insait long Komonwelt. POTO: Royal Family.

Dispela Sarere, Me 6, 2023 bai wanpela bikpela de insait long histri bilong Papua Niugini na ol arapela Komonwelt kantri. Koronesen bilong King Charles III olsem het bilong Komonwelt bai kamap long dispela de long Westminster Abbey long London, England. Em i wanpela impoten de long PNG tu bilong wanem PNG em i wanpela bilong ol ‘Realm’ o Kingdom insait long Komonwelt we Charles III em i King bilong en.

I gat 72 kantri na ol teritori, na 15 realm insait long Komonwelt. Gavana Jeneral bilong PNG, Sir Bob Dadae i stap pinis long London long makim kantri long dispela bikpela bung.

Asbisop bilong Canterbury Justin Welby bai go pas long dispela lotu na koronesen seremoni we moa long 2,200 manmeri bai kamap long en.

Namel long ol lain bai kamap ol memba bilong Royal Famili, ol wan wan manmeri makim 203 kantri, na 100 het bilong ol stet olsem ol gavana jeneral.

Long PNG, bai gat wanpela bikpela bung tu long Sarere avinun long Sir Hubert Murray stadium long Mosbi long amamasim koronesen bilong King Charles.

Prins Charles i kamap King long Septemba 8, 2022 taim mama bilong em, Kwin Elizabeth II i bin dai.

Koronesen em i olsem blesing na ofisal luksave bilong em olsem King.

Namel long ol ofisal wok bilong em insait long United Kingdom, King Charles III i save lukautim na ranim tu ol sariti ogenaisesen. Insait long 40 yia, em i kamapim moa long 20 sariti we em i save sapotim na insait long wok bilong em.

Olsem King bilong PNG, Charles III em i het bilong kantri na lukaut na luksave bilong em i stap long PNG wantaim Gavana Jeneral husat i makim em long hia.

PINIS.