Ol pikinini mas lainim gutpela pasin long han bilong papamama bilong ol bipo long ol i kamap bikpela na lusim ples i go aut long kantri.

Joseph Dawai i raitim

SAMPELA pasin nogut bilong painim mani wok long kamap bikpela insait long olgeta hap bilong kantri.

Pasto Goina Tau bilongTauruba ples long Rigo distrik i tok olsem planti papamama i karim ol pikinini na i no save lainim ol gut.

Ol dispela pikinini save painim rot bilong mekim mani na sampela taim ol i save mekim kain kain pasin we i no stret.

Em i tok wanpela bilong ol dispela pasin em i pasin bilong go raun wantaim ol man i gat planti mani na dispela i kamap olsem wanpela isipela rot long kisim mani hariap.

“Dispela i no kamap long ol bikpela manmeri o yanpela tasol, dispela pasin em i kamap long pikinini gat 8-pela krismas na i go antap,” Pasto Goina i tok.

Em i tok em i save lukim planti ol manmeri save mekim dispela wok bilong kisim mani kwik na em i no amamas long en.

Wanpela taim Pasto Goina i lukim papa bilong wanpela liklik pikinini meri i kam salim pikinini stap long Boroko we ol lain long Magi Haiwei save kisim bas i go long ples, na em i no bin amamas long dispela pasin.

Em i tokim papa bilong dispela pikinini long lusim dispela kain pasin.

Pasto Goina i tok dispela kain pasin i ken mekim namba bilong sik HIV/AIDS i go antap moa.

“Dispela sik HIV/AIDS em i kamap bikpela moa long ol pikinini aninit long 16-pela krismas long rekod bilong kantri bilong yumi.

“PNG em i Kristen kantri na yumi gat planti risos long mekim mani, tasol yumi kamap les manmeri na yumi no luksave long kamapim samting yumi gat pinis long mekim mani,” Pasto Goina i tok.

Namba wan samting em yumi papamama i mas save long wanem yumi save kamapim pikinini, na ol dispela pikinini em i blesing bilong God i kam long yumi manmeri bilong dispela graun.

“Sapos yumi lukautim ol pikinini gut na lainim ol long tok bilong God bai yumi inap luksave long ol gutpela samting i stap wantaim yumi na helpim yumi yet,” em i tok.

PINIS.