Naguri no amamas long Komisina Manning i senisim PPC bilong Madang

James G. Kila i raitim

MEMBA bilong Bogia, Robert Naguri i tok Praim Minista James Marape wantaim Nesenel Ekseketiv Kaunsil (NEC) na Polis Komisina i no ken yusim Madang olsem ples bilong tromoi nating ol polis opisa husat ol arapela provins na polis dipatmen i no nidim ol moa.

Em i tok olsem Madang no ken kamap olsem ‘dumping ground’ o ples bilong tromoi ol samting we i no gat yus moa.

Mista Naguri i mekim dispela strongela toktok taim em i muvim wanpela mosen long kibung bilong Madang Provinsal Asembly long Madang las wik antap.

Em wantaim ol sampela memba bilong Madang PEC i toktok strong tru long dispela bung olsem ol i no amamas long transfea o muvim bilong Madang ekting provinsel polis komanda (PPC), Mazuc Rubiang i go long Mendi long Sauten Hailans provins.

Naguri i tokaut olsem dispela transfe bilong ekting PPC Rubiang i go long Mendi em bai lukim em i kisim wok olsem polis stesen komanda o PSC.

Mista Naguri i toktok strong na kros long Polis Komisina, David Manning long makim David Seine olsem nupela PPC bilong Madang provins.

Em i tokaut olsem em i painimaut olsem Mista Seine em wanpela ‘attached’ opisa, na Madang i no nidim kain opisa long go stap long provis bilong wanem Madang em i no “dumping ground” bilong polis hetkwata na komisina i mekim olsem .

Narapela samting em i tokaut long dispela bung, em Polis Komisina Manning i bin makim wanpela sinia polis mobail skwat opisa, Robert Baim long posisen olsem polis stesen komanda (PSC) long Madang.

Mista Naguri i tok Madang provins i gat sampela ol bikpela risos projek na invesmen olsem Ramu Nikel maining na tu Pasifik Marin Indastrial Zon (PMIZ) bai kamap, na sekuriti em bikpela samting tru.

Olsem na gutpela man husat i gat save long lo na oda hevi long Madang i mas stap na kontrolim wok bilong polis fos long provins.

Mista Naguri i tok strong olsem gavman na Polis Komisina moabeta i mas kisim tingting bilong ol lida bilong Madang sapos ol i laik kamapim senis long bikpela ogenaisesen olsem polis.

Mista Naguri i tok strong olsem sapos Komisina Manning i makim Robert Baim long go long Madang orait em i mas kamap PPC bilong wanem em i man bilong Madang na save long lo na oda hevi long provins.

PINIS.