Long Tunde dispela wik, totol namba bilong ol pipel long wol em inap 8 bilien na i wok long kaunim i go antap moa.

Ezekiel Lawrence i raitim

LONG dispela wik Tunde, 15 Novemba, populesen bilong wol i kamap long 8 bilien na i wok long kaunim i go antap.

Ol kantri long Asia na Africa i go pas long kamapim bikpela namba long gro bilong populesen we i stap nau long dispela mak.

United Nations Population Funds (UNFPA) i bilip olsem ol kantri long dispela tupela rijon bai kamapim narapela 1 bilien populesen long yia 2037.

India i abrusim pinis China, na i go pas long gro bilong populesen, we namba bilong ol i stap long 177 milien.

PNG National Statistical Office (NSO) i save go pas long painimaut na rekodim o kisim sensas long populesen bilong kantri.

Laspela taim we NSO i bin kisim sensas long populesen bilong PNG em long 2011, na namba bilong ol manmeri long dispela taim i bin stap long 8 milien.

NSO i no stap long mak bilong tokaut yet long total populesen bilong PNG dispela yia long wanem hevi bilong COVID-19 las yia i bin pasim ol long mekim wok painimaut gen.

UNFPA i wokbung wantaim NSO long Septemba las yia i kam inap Novemba dispela yia, na ol i divelopim na testim rot bilong tingim na traim makim populesen bilong kantri long dispela yia.

UNFPA i wok wantaim WorldPop, we em i wanpela wok painim o ‘reses’ grup husat i save mekim wok painim long populesen bilong ol kantri, rijon, na wol.

WorldPop i save bungim na rekodim ol infomesen long ol mobail netwok, satelait, wokabaut bilong ol pipel, na ol bipo wok painimaut o ‘seve’ long kisim populesen bilong wanpela hap.

NSO National Statistician, John Igitoi i tokaut olsem wok painimaut long sensas bilong kantri bai pinis long namba tri hap bilong neks yia.

NSO i hat yet long tokaut long total populesen bilong kantri long dispela taim, long wanem ol i yusim dispela nupela sistem long painimaut namba bilong ol manmeri.

Mista Igitoi tok ol i lukim planti bikpela senis long populesen bilong kantri bihain long ol i traim dispela nupela wok painim program.

Long dispela taim, ol i kisim infomesen long ol nesenel, na sab-nesenel level, na ol i no go daun yet long ol lokal level.

UN Residen long PNG, Marielle Sanders i tok PNG em i wanpela hatpela kantri long kaunim namba bilong olgeta manmeri, long wanem namba bilong ol manmeri wok long gro olgeta de.

PINIS.