Ol wod kaunsil i tok Gavana bilong Sentral Provins, Rufina Peter i no wok long wokbung wantaim ol

Joseph Dawai i raitim

WANPELA ripot i tok olsem Sentral Provinsel Gavana, Rufina Peter i no wok bung wantaim ol wod kaunsil na Lokal level Gavman (LLG) bilong Provins.

Vais Presiden bilong Koiari LLG, Vince Geno i tok Gavana bilong Sentral Provins i no wok bung wantaim Koiari LLG na ol wod kaunsil bilong Hiri Koiari ilektoret.

Mista Geno i tok ol LLG na wod kaunsil i wok ol yet na ol i no save long wanem samting gavman bilong ol i wok long mekim, na husat bai wok wantaim Wol LLG.

“Ol kaunsil na LLG husat i save stap klostu wantaim ol manmeri na ol i no save long wanem samting nesenel level i wok long mekim, na pasin Gavana i wok long mekim i no stret,” em i tok.

Mista Geno i tok pasin bilong wok we Mis Peter i wok long mekim em yet i no stret long wanem ol wod kaunsil na LLG i no save long wanem hap, ol inap wok bung wantaim provinsel gavman bilong ol.

“Bai mipela wok bung wantaim olsem wanem? Gavana i no toktok liklik wantaim mipela na mipela i no save long wanem samting bai mipela inap mekim.

“Mi no save long wanem samting ol narapela LLG bilong ol narapela distrik bilong provins i wok long mekim wok i stap tasol Hiri Koiari nau i stap em yet na i no pas wantaim Sentral Provinsel gavman,” em i tok.

Gavana Peter i no bekim dispela tingting bilong Vais Presiden bilong Koiari LLG, tasol wanpela opisa husat i wok insait long opis bilong gavana i tok, gavana bai long traim stretim opis bilong em pastaim em i statim wok long neks yia.

Long wanem pastaim gavana i bin lusim, sampela wok we em i mas lukluk gut na stret, orait bai ol i toksave long ol distrik long wok bung wantaim long kamapim ikonomik divelopment.

PINIS.