Minista bilong ‘Civil Aviation’ na Memba bilong Namatanai Walter Schnaublelt i promis long putim pawa i go bek long Namatanai bihain long ples i stap tudak longpela taim.

Lina Keapu i raitim

MINISTA bilong ‘Civil Aviation’ na Memba bilong Namatanai Walter Schnaublelt i kisim bek sia bilong em olsem siaman bilong Namatanai Distrik Divelopmen Atoriti long namba tu taim.

Mista Schnaubelt i kisim opis wantaim arapela 5pela Lokal Level Gavman (LLG) presiden na wanpela meri we i kisim opis tu.

Long wanpela bung bilong ol long las wik long Namatanai, Mista Schnaubelt i promis long wok wantaim olgeta pablik sevan long Namatanai DDA.

“Long dispela taim mi no inap wari long wanem pati yu stap long en, bai yumi olgeta i wok wantaim.

“Las 5pela yia i bin taim we mi bin lainim ol samting na nau bai mi go fowet long olgeta wok bilong mi long sevim distrik.

“Nau bai yumi mas senisim rot bilong wokim bisnis long wanem politiks em i no gutpela tumas, we i gat bikpela salens i stap,” Mista Schnaubelt i tok.

Mista Schnaubelt i tokim DDA bilong em olsem lukluk bilong em nau i stap long putim bek pawa long Namatanai taun we long taim tumas em i aut, na i bagarapim ol bisnis operesen tu.

“Putim bek pawa em namba wan wok bilong mi long wanem em long taim stret yumi i stap long tudak.’”

Em i tokaut tu olsem, em i baim pinis wanpela 750 kilowat (KVA) ‘biomas’ jenereta na em i stap pinis long provins.

“Yumi gat tripela 250 kilowat na i stap pinis long provins we bai givim yumi 24 awa pawa.

“Mipela wok long painim graun long sanap wanpela liklik haus long putim dispela jenereta.

“Wanpela pawa kampani bilong ples yet, Lihir ‘Electricity’ bai wok klostu wantaim DDA long apim netwok bilong pawa long Namatanai taun,” Mista Schnaubelt i tok.

Mista Schnaubelt i tok, ol arapela lain husat i givim sevis i helpim kisim sevis i kam long ol pipel bilong Namatanai.

PINIS. //