Planti taim i save paulim ol rekod bilong ol kastoma na em i save mekim ol i bubngim hevi o wari long mani bilong ol.

Joseph Dawai i raitim

SAMPELA taim mani long benk i save lus nating long wanem ol manmeri i no save gut long benking sistem, olsem na sampela paul pasin i save kamap insait long benk.

Mista Tony Tau Motu bilong Gabagaba ples bilong Rigo Distrik long Central Provins, i bin kam long Mosbi long las wik Sarere bilong wanem pikinini man bilong em husat i save wok long Pogera Gold Mine, i bin salim K250 long BSP benk akaun bilong em.

Mista Motu i tok em i bin rausim K50 long Sarere, na long Mande moning em i go bek long ATM masin long rausim sampela moa mani tasol i no gat mani long benk kad bilong em.

Em i traim tupela taim long 4-mail, Boroko na wanpela long TST Sentral Waigani tasol no gat yet, na taim em i kam bek long 4-mail, ples i go tudak olsem na em i go stap long 4-mail polis stesen i go inap moning.

Long Tunde moning tru em i go tokim wanpela sekyuriti opisa bilong ATM masin na em i helpim em long printim benk stetmen.

Bihain em i go kisim wanpela wantok bilong em long 5-mail na tupela i go long BSP benk long 4-mail.

Tupela i toktok wantaim BSP benk opisa long 4-mail na em i givim ATM na EFTPOS disput trensaksen edvais fom na Motu i raitim ol infomesen bilong em na givim bek.

Taim benk opisa i sekim balens bilong Mista Motu pinis, em i tokim em olsem mani bilong em i stap yet tasol i gat liklik asua i bin stap long kad bilong em.

Mista Motu i tok dispela kain pasin i save kamap long planti ol manmeri na ol i no save kisim bek mani bilong ol na benk i save kisim mani bilong ol nating.

Mista Motu i bin wok planti yia olsem sekyuriti opisa long Mosbi na em i save long yusim benk kad olsem na em i tok kain pasin benk i save mekim em i no long stret.

“Planti kastoma bilong BSP benk i save kros tasol ol wokman na meri bilong bilong benk i no save senisim pasin bilong wok,” em i tok.

PINIS.