Wes Niu Briten i redi long holim namba wan Provinsel Tavur So bilong ol we bai givim sans long ol manmeri long provins long soim kainkain pasin tumbuna na kalsa bilong ol.

NCC Ekseketiv Dairekta, Steven Enomb Kilanda (namel) i givim setifiket i go long Gavana Muthuvel long luksave long Provinsal Tavur De. POTO: Supplied.

Angelyn Top i raitim

WES Niu Briten (WNB) i redi long holim namba wan Provinsel Tavur So bilong ol long Novemba 14th i go long 18th long Kimbe taun dispela yia.

Lonsing bilong dispela kalsarel So i bin kamap long het opis bilong National Cultural Commission (NCC) long Mosbi las wik.

Dispela So i kamap wantaim astingting bilong Divisen bilong Kalsa na Turisem na sapot bilong WNB provinsel gavman na tu wantaim helpim bilong NCC na Tourism Promotion Authority (TPA).

Wantaim het tok “Kisim Bek Wes Niu Briten wantaim Hat na Kalsa,” dispela kalserel bung bai kamap long olgeta yia. Em bai bringim olgeta distrik long soim wanwan kalsa bilong ol.

Dispela bung bai givim sans long ol arapela ol provins long go na soim kalsa bilong ol tu.

Kalsa na Turisem Divisen bilong WNB provins nau i holim ol Lokal Level Gavman kalsarel bung we i redim ol long bikpela provinsel bung bilong ol.

NCC Ekseketiv Dairekta, Steven Enomb Kilanda i tok WNB em i namba wan provins long sainim kontrak wantaim NCC long holim dispela kain bung.

“Komisin i amamas long sapotim dispela bung wantaim K10,000 we bai helpim kalsarel komiti long redim ol samting. NCC i kamap hap bilong planti ol LLG kalsarel bung we WNB i holim pinis na mipela i amamas tu long wok strong wantaim yupela long mekim dispela Novemba bung i kamap bikpela na wok hat long bihain ol wankain bung tu,” Mista Kilanda i tok.

Gavana Muthuvel i tok dispela bung em i wanpela rot we provinsel gavman i kisim long stretim lo na oda isu bilong provins.

Mista Muthuvel i tok planti kainkain hevi ol yangpela i save kamapim na i no gat rispek bilong ol long komyuniti.

“Taim yumi kirapin gen ol pasin tumbuna bilong yumi, ol yangpela inap long lainim na luksave long ol dispela. Ol bai lainim long rispekim ol lapun, sif na ol meri long komyuniti. Planti ol samting nogut i save kamap long wanem ol yangpela i no save gut long kalsa bilong yumi. Mi amamas long kirapim bek kalsa na em bai stretim ol sosel isu long komyuniti,” em i tok.

Ekting deputi provinsel edministreta Ekonomik Sevis na Tavur So siaman, Harold Rawei i tok WNB em i liklik PNG we ol manmeri long olgeta hap i save go stap.

“Long dispela provinsel bung, yumi laik lukim kainkain kalsarel grup bilong olgeta hap long kantri na ol distrik long WNB i kam bung,” em i tok.

Long wankain taim, NCC i givim setifiket bilong luksave long dispela bung na tu presentim NCC 2022-2032 plen buk bilong ol i go long WNB gavman.