Praim Minista James Marape i mekim wanpela bikpela raun long bungim ol lida bilong sampela ol bikpela kantri long wol long paiim ol rot bilong treid na ol arapela invesmen i kam long PNG.

PAINIM ROT BILONG IKONOMI: Wok bilong Mista Marape long raun painim treid na invesmen sapot long ol arapela bikpela kantri, i winim sapot bilong ol Minista bilong em. POTO: Wantok File.

Lina Keapu i raitim

Minista bilong Fiseris na Risos bilong Solwara, Jelta Wong i soim amamas bilong em long Praim Minista, James Marape long wanem, taim em i go long wokabaut bilong em long ol England, USA, Japan, Austalia na bungim ol wol lida, em i opim rot bilong ol risos bilong PNG.

Mista Wong i tok, Mista Marape em wanpela Praim Minista bilong kantri husat i go mekim hap wok bilong ol Minista long kamapim ol rot bilong wok na invesmen tu insait long kantri. Em i tok, Mista Marape i makim maus bilong ol Minista na toktok wantaim ol wol lida we em i mekim wok bilong ol isi stret.

“Taim Mista Marape i go long Japan, em i bin bungim Praim Minista bilong Japan Fumio Kushida na em i bin tok long ol pis bilong PNG bai go long Japan. Yumi i ken salim pis, kindam na ol narapela orisos bilong solwara i go long Japan long gutpela prais stret, tasol dispela bai no inap kamap nating. Toktok namel long tupela kantri, PNG na Japan i mas kamap pas long kamapim nupela pasin bilong tred.”

“Nau olsem Covid-19 i wok long pinis, em i rait taim long mekim toktok long ol balus bilong PNG i go stret long Japan we ol i ken karim pis bilong PNG go long ol maket bilong Japan,” Mista Wong i tok.

Mista Wong i tok, em bai tokaut long ol sampela gutpela samting we bai amamsim kantri, na pasin Mista Marape i wokim em gutpela tru long wanem Japan em i wanpela gutpela hap long salim pis. Em i tok, wokabaut Mista Marape i mekim long 4-pela kantri em we bilong ol lida long mekim long painim rot bilong lukautim ol pipel na kantri wantaim, long dispela taim bilong nupela na bikpela stail bilong ikonomi.

Tu, Mista Wong i toktok strong long ol niuslain husat i bin toktok planti long dispela wokabaut bilong em.

“Yumi mas save olsem kain ol wokabaut bilong ol Minista o Praim Minista em wokabaut bilong painim we long kamapim tred wantaim narapela kantri, na i no bilong ol niuslain long ol giaman stori na ripot, noken wokim ripot bilong giaman.

“Sampela ol niuslain i wok long helpim long strongim kantri na sampela i wok long mekim ol giaman stori raun,” Mista Wong i tok.

Mista Wong wantaim wanpela tim bilong Nesenel Fiseris Atoroti (NFA) i go long Bangkok long ‘World Tuna Conference’ we i kamap long Oktoba 11 i go long 13, long las wik Sarere Oktoba 8 long Shangri-La.