Sampela kain wok painimaut i mas kamap long luksave long wanem na i gat planti ol liklik mangi na pikinini wok long raun na silip nating long ol strit insait long ol bikpela taun na siti olsem Mosbi.

Joseph Dawai i raitim

SAPOS gavman i laik kisim bek PNG, orait em i mas painim rot we i moa gutpela long stat long mekim kantri bihainim long kisim bek PNG.

Yupela ting mani o kago bai inap mekim wok ol yet long divelopim dispela kantri we yumi olgeta i save i stap long en na laikim tumas? Ating dispela kain tingting em i kranki tingting long wanem ol mani na kago bai no inap wokabaut o tingting long mekim em yet i kamap bikpela.

Ol pipel i save tingting, pasim tok na mekim wok long groim nesen bilong ol, sapos no gat wanpela pikinini i raun nating long strit, na olgeta i stap long haus na i go long skul gut long kisim gutpela save long helpim komyuniti na famili bilong ol, ating dispela tingting em bai orait tasol.

Wanem samting i wok long kamap long planti ol pikinini insait long kantri, em i no hevi bilong ol papamama tasol dispela hevi bai bagarapim kantri. Olsem na Nesenel Opis bilong Pikinini na Famili Sevis (NCFS) i laik mekim wanpela wok painimaut long ol bikpela taun na siti bilong PNG insait long 4-pela rijon bilong kantri.

NCFS Dairekta, Simon Yanis i tok dispela plen bilong kamapim dispela wok painim aut bai kamap wantaim helpim bilong sampela patna i gat intres long dispela tingting. Mista Yanis i tok dispela wok painim aut bai lukluk long adresim hevi bilong ol pikinini husat ol wok long raun nabaut na slip kirap long strit.

“Mipela mas painim aut long husat tru i wok long kamapim dispela hevi na yumi gat planti strit pikinini, i no olsem bipo. Olgeta taim bai yumi bilip tasol long ol tokwin na putim hevi long wanpela narapela we yumi ting dispela samting i bin kamap long ol pikinini. Tasol opis yet i mas mekim wok painim aut pastaim long em i ken askim gavman long helpim long stretim dispela hevi wei wok long kamapim bikpela long ol taun na siti,”em i tok.

Gavman i tok long kisim bek PNG na toktok bilong en long no ken lusim wanpela pikinini stap nating.

NCFS opis I makim pinis ol taun na siti olsem; Lae, Hagen, NCD na ol narapela senta long mekim dispela wok painim aut long traim na kamap wantaim gutpela eksen plen bilong bihainim.