Bikpela ren i mekim Wagol wara i tait na bagarapim ol haus na pretim ol manmeri long Madang taun.

TAIT WARA: Wanpela mama i karim pikinini na brukim wara i go long drai ples taim Wagol wara i solap yet. POTO: James G. Kila.

James G. Kila i raitim

PLANTI handret manmeri na pikinini husat i save stap arere long Wagol wara long Madang taun i bin bungim bikpela bagarap long Tunde moning taim wara i tait na bagarapim ples.

Dispela i kamap bihain long bikpela ren i pudaun longtaim na i mekim wara i solap. Ol pipel long Wagol setelmen i bin pret taim mak bilong wara i go antap na karampim olgeta eria long hap ol i stap long en.

Ol i tok ren i bin stat pudaun long wan kilok long moning taim tru na i no pinis hariap. Dispela i mekim ol liklik baret long ol maunten long hap bilong Sisiak, Humade na ol asples olsem Furan, we wara long hap i ran i go bungim bikpela Wagol wara, na i go olsem long taun na bagarapim ol haus long setelmen long taun eria.

Wanpela mama, Esther Baira i tok em i slip wantaim ol pikinini stap na ol i kirap nogut olsem wara i solap i go antap na tasim matres ol i silip long en.

Paulus Tat, wanpela lapun man bilong Kambramba long Angoram distrik long Is Sepik provins husat i save stap long kona long 26-bas stop, i tok bikpela ren i stat pudaun long wan kilok long Tunde moning na i go bikpela moa namel long tri na foa kilok.

Long faiv na sikis kilok long moning ren i wok long pudaun yet na bikpela not kos rot i go olsem long Bogia, i bin pas. Dispela em long wanem ol baret wara long hap long Bilia maus rot setelmen i bin solap na go antap long mein rot. No gat liklik kar i bin ran i go kam long dispela seksen bilong rot.

Madang Provinsel Disasta Opis dairekta, Rudolf Mongalie i tok olsem ol dispela pipel long Wagol na ol arapela setelmen long Madang taun i bin bungim hevi taim bikpela guria i bin kamap long las mun we i brukim sampela haus bilong ol. Em i tok ol dispela lain i no bin kisim helpim long dispela na nau narapela hevi i bungim ol gen. Mista Mongalie i tok opis bilong em i wetim Nesenel Disasta Senta long Mosbi long salim tupela kontena bilong ol saplai bilong helpim ol kain ples i bagarap tasol ol kontena i no go yet long Madang.