Praim Minista Marape i tok wok bilong stretim hevi bilong lo na oda insait long Mosbi siti na long kantri em i wok bilong Polis Komisina, David Manning wantaim ol polis opisa bilong em.

POLIS WOK: Praim Minista Marape i tok Polis Komisina David Manning (piksa) i mas mekim wok bilong em long lukautim lo na oda insait long kantri.

Lina Keapu i raitim

Praim Minista, James Marape i tok wok bilong Polis insait long kantri i stap wantaim Polis Komisina David Manning.

Em i mas mekim ol arest long daunim ol hevi na dai we i wok long kamap insait long kantri, na tu toksave olsem wok polis em i stap strong.

Mista Marape i tok, em i save makim Polis Komisina na Deputi Komisina long mekim wok bilong polis insait long kantri.

“Wok bilong Praim Minista em bilong makim Komisina, Deputi bilong em na gen mi givim ol risos long mekim wok bilong ol. Mipela i strongim lo bilong gan pinis we ol man i gat gan o ol mekim nating long gan bilong ol, bai go kalabus long wanpela yia.

“Wok bilong mi long strongim lo em pinis, em taim bilong narapela man long mekim wok.”

Em i tok, sapos ol lain bilong mi long Tari-Pori mekim rong o kamapim hevi, Polis Komisina na Polis Fos i mas arestim ol.

“Mista Komisina, mi no inap ringim yu olgeta taim long ol hevi kamap long wanwan ples long tokim yu long mekim arest, em i wok bilong yu, yu sainim pepa long mekim dispela wok, Praim Minista no inap tokim yu long mekim arest o wok polis," Mista Marape i tok.

Mista Marape i mekim dispela ol toktok taim Deputi Oposisen Lida na Memba bilong Kiriwina-Goodenough, Douglas Tomuriesa i toktok long kainkain hevi wok long kamap insait long Mosbi siti.

Mista Tomuriea long dispela wik Tunde Oktoba 11 long palamen i askim Mista Marape sapos em i gat sampela tingting long stopim ol pait insait long siti na strongim lo na oda. Em i tok, planti dispela ol hevi em ol Tari save kamapim tasol em no tingim olsem ol arapela lain tu i  save kamapim wankain ol hevi.

Mista Marape i bekim na tok, “I no ol Tari tasol i save kamapim ol hevi insait long siti, olsem na long Mista Tomuriesa i sutim tok long ol Tari tasol em no stret. Ol Tari em wankain olsem ol arapela ol lain husat save burukim lo, i gat ol Tari husat ol i save bihainim lo. “Gutpela Memba i no laik kam long haus dua bilong mi na lukim sapos ol lain bilong mi save kam long haus na askim mi long helpim ol. Ol Tari em ol hatwok lain long mekim ol liklik bisnis bilong ol, na lukautim ol yet.”

Mista Marape i tok, distrik bilong mi em wanpela ikonomi eria we LNG bilong mipela i lukautim PNG long 30 yia tasol ol sevis olsem Edukesen, Helt, Polis na Kot i mekim ol i kam long Mosbi.