Kot i givim tok orait long ol polis i rausim ol manmeri husat i sidaun long New Block long Morata 1 long Nesenel Kapitel Distrik.

PIPIA NATING: Planti ol haus i bruk na sampela i paia taim polis i karimaut eviksen long Morata 1 setelmen long Mosbi long Trinde dispela wik. POTO: Andrew Molen/ Wantok.

Andrew Molen i raitim

MOA long 5,000 manmeri husat i save stap long New Block long Morata 1 o ‘Portion 2733’ insait long Nesenel Kapital Distrik (NCD), i wok long painim ples bilong silip nau.

Dispela em bihain long Suprim kot i givim oda long ol polis long rausim ol pipel husat i stap long dispela hap.

Polis i kamap long Morata 1 long 11 kilok moning long dispela wik Trinde, Oktoba 12 wantaim ol bikpela masin na tokim ol manmeri long lusim ples. Ol pipel i sanap strong long toktok agensim dispela wok tasol ol polis i go het long brukim na rausim ol samting. Polis i sutim tu tia ges long ranim ol manmeri husat ol i traim long pasim ol.

Dispela eviksen i sapos long kamap long Mande dispela wik tasol Gavana bilong NCD, Powes Parkop i putim wanpela aplikesen aninit long National Capital District Commission (NCDC) long kot long traim na stopim dispela wok.
Tasol kot i tok NCDC i no stap insait long dispela kes olsem na ol i nogat rait long kisim kot oda long stopim. Ol nius ripot i makim Jas, Lawrence Kangwia i tok olsem ol pipel husat ol i stap insait long dispela hevi tasol i ken kisim kot oda long stopim dispela eviksen wok. Dispela ekviksen i kamap long rausim ol manmeri husat i sidaun long dispela hap graun we wanpela kampani, Sixth Estate Limited (SEL) i papa long en.

NCDC i bilip SEL i no bihainim stretpela rot long kisim dispela hap graun we inap 60 hekta (ha) olgeta, na ol i wok long kot wantaim SEL long kisim bek dispela graun. Long dispela, kot i tok em i narapela kes na i no wankain olsem dispela eviksen kes, olsem na wok bai go het long rausim ol pipel. Philip Paguk i tok i no gat man i bin sidaun long dispela graun taim em i bin baim na kisim taitel long 2011. Em i tok tu olsem em i givim planti toksave pinis long ol manmeri long hap long lusim ples na i go tasol ol i no harim tok.

Websait bilong PNG Investment Promotion Authority (IPA) i soim SEL olsem wanpela kampani we i rejista long Oktoba 7, 2008. Em i soim olsem ol dairekta bilong kampani em Mista Paguk na Mista John Lavanin Pokarop. Ol bipo seaholda bilong SEL em Zhao Hong Li na Best Group (PNG) Limited.

“Mi papa bilong graun na mi gat rait long kisim bek dispela graun na kamapim invesmen na ol wok divelopmen long en,” Mista Paguk i bin tok.

Wanpela man husat i stap longtaim long New Block em Nickson Nukints husat i bin kamap long lukim paia i pinisim bikpela haus bilong em. Mista Nukints i no save paia i kirap olsem wanem o husat i statim tasol em i kamap taim wok bilong eviksen i kirap.

“Mi harim gan i pairap na ol masin i go insait long brukim ol haus na ol manmeri ranawe nabaut, bihain mi lukim paia i kam kukim ol haus long fran, i no longtaim em i kalap i kam kukim haus bilong mi tu,” Mista Nukints i tok.
Mista Nukints i tok em i kamap long hap long 2007 yet we em i stap i kam inap nau.

“Mi baim dispela hap graun mi sidaun long en long ol papagraun bilong Koiari. Mipela olgeta i mekim olsem,” em i tok.

Sampela ol mama husat ol i wok long karim ol kago bilong ol i go long rot, i tok ol i no harim wanpela toksave tu olsem dispela eviksen bai kamap.

NCD Metropolitan Superintendent, Gideon Ikumu i tok kot i givim oda bilong eviksen long Julai 25  ispela yia tasol ol i no bin mekim long wanem kantri bin stap namel long namel bilong nesenel jeneral ileksen.

Gavana Parkop i tok long salensim SEL yet long kisim bek dispela graun, tasol nau yet ol pipel long dispela hap bai painim ples long silip.