Taim bilong ol rit i go bek, i kam klostu nau na ol sekyuriti fos long Sauten Hailans provins i toktok wantaim ol wokmanmeri bilong Ilektoral Komisin long hariapim kaunim. Ol i laik bai em i mas pinis bipo long taim bilong ol rit i go bek.

GIVIM TOKTOK: PNGDF Liaison opisa bilong SHP, Major Joshua Dorpar i toktok wantaim sampela ol skrutinia. POTO: RPNGC.

MENDI: OL sekyuriti fos long Saunten Hailans provins (SHP) i bung long las wik long toktok long strongim wok long helpim ileksen wok long hap long pinis bipo long ol rit i go bek long Ogas 12.

“Wok bilong kaunim long provins i wok long ran isi tumas olsem na mi bung wantaim Provinsal ileksen mensa, Alwynn Jimmy, ol komanda bilong ol kwik respons fos, Provinsal polis komanda, Sif Inspekta Daniel Yangen na ol ileksen toral opisal long provins long painim ol rot bilong ol mekim wok i ran hrapi liklik,” Hailans Westen End Komanda, Ekting Asisten Komisina John Kale i tok.

Em i tok ileksen wok na kaunim i wok long ran gut long provins na i no gat wanpela bikpela hevi i kamap yet, tasol em i wok long kisim ol ripot nau olsem sampela ol man i wok long bungim gan na ol arapela samting bilong pait, insait long Mendi taun.

SEKIM BOKIS: Police woman Senia Konstabal Anna Linus na Sajen Masila Touve i rekodim ol tag namba bilong ol balot bokis bilong Provinsal sia long SHP. POTO: RPNGC.

I gat ripot tu olsem sampela ol kendidet i laik pasin rot long Mendi i go long Tente na Kiburu tasol ol i kisim tok lukaut pinis long noken mekim.

Mista Kale i tok sekyuriti na seifti bilong olgeta manmeri na ol woklain bilong ileksen em i wanpela sa tu long ol i laik hariapim wok bilong kaunim.

“Mipela i tokim ol opisal bilong ilektoral Komisin long hariapim wok liklik na dispela i kamap nau.

“Wok bilong ol i wok long kamap gut moa nau na i luk oslem mipela bai nap long pinisim kaunim insait long dispela wik yet,” Mista Kale i tok.