No gat planti manmeri bin raun long Madang taun las wik Fonde long wanem ol i bin pret bihain long ol pret toktok olsem sampela sapota bilong ol ileksen kendidet i baim planti bus naip na i laik kamapim hevi. Tasol polis i  tok ol i stap redi long lukluk sapos kain hevi i kamap.

PRET: Ol stua long Madang taun i pas na no gat planti manmeri raun long taun bihain long ol pret toktok i kamap long sosel midia. POTO: James G. Kila.

James G. Kila i raitim

PLANTI manmeri long Madang taun long las wik Fonde i bin pret bihain long ol pret toktok i go raun long sosel midia olsem sampela sapota bilong ol Ileksen kendidet i baim planti bus naip long wanpela stua long taun na i laik kamapim hevi.

Dispela pret toktok i mekim planti manmeri na ol bisnis haus long Madang i lusim wok hariap tru long apinun na ol bas tu i stop long taun, na i no gat planti lain i sanap.

Planti wokman meri husat i save slip long ples long not kos rot, na tu long saut kos i toksave long bos lain bilong ol na i lusim wok hariap na go long bas stop long kalap long bas i go long haus.

Tasol Madang provins Provinsal Polis Komanda, ekting Suprintenden Mazuc Rubiang i tokaut long midia olsem sekyuriti fos bilong PNG husat nau i stap long lukautim Ileksin long Madang, i redi long mekim save long husat ol lain i laik kamapim trabol long taun.

Mista Rubiang i tok em i lukim tu dispela hap tok we i bin kamap long sosel midia Facebook, tasol em i tok bikpela namba long ol sekyuriti fos olsem ol mobail skwat polis bilong Lae na Goroka nau i stap long Madang, na ol i redi tasol long daunim wanem kain pret o trabol long kamap.

Em i tok tu olsem ol ami bilong PNG Difens Fos tu i stap long Madang nau yet long provins long lukautim ran bilong Nesenel Jeneral Ileksen.

Long las wik Fraide moning ol polis wantaim ol PNG Difens Fos soldia i stat long sekim ol trak, kar na ol PMV bas i go insait long Madang taun.

Ol i sanapim sek poin long Handy Mart maus rot na sekim ol kar i kam olsem long Bogia na saut kos rot, na tu Hailans rijon.