Memba bilong Kandep na lida bilong THE pati, Don Polye i tokaut long sapot bilong em long James Marape na PANGU pati long kamapim nupela gavman bilong 11 palamen.

SOIM SAPOT: Memba bilong Kandep open, Don Polye i tok em i sapotim James Marape na PANGU long kamapim gavman. POTO: File.

Lina Keapu i raitim

MEMBA bilong Kandep Open, Don Polye em i wanpela memba tasol bilong Triumph Heritage Empowerment (THE) pati long dispela taim.

Tasol Mista Polye i no stap nating, em i kisim luksave na sapot bilong lida bilong PANGU pati, James Marape pinis.

Mista Polye i tok tenkyu long Mista Marape long luksave long ol liklik ol politikal pati olsem THE long dispela taim bilong kamapim gavman.

Mista Polye i tok, em i amamas long stap wantaim tim long Loloata kem long redim ol yet long kamapim nupela gavman. Em i tok long 2017 em i no bin gat sans long wanem em i stap long palamen 7-pela mun tasol bihain long kot i bin givim oda long kaunim gen vot bilong Kandep Open we i lukim em i bin win.

Mista Polye i tok tu olsem, em i gat bilip long dispela patnasip we i stap nau na i tok long wok bung wantaim long gutpela bilong kantri.

“Mi gat bilip long PANGU Pati, mi gat bilip long Nesenel Alaians, mi gat bilip long United Risos Pati na ol narapela pati i stap insait long dispela kolisen,” Mista Polye i tok.

Em i tok tenkyu gen long PANGU pati long wanem ol i bin holim gavman liklik taim tasol ol i bin mekim bikpela wok long stretim ikomoni bilong kantri, na tu kamapim ol nupela gavman progrem na divelopmen.

“I gat ol lain i stap husat i save toktok na bagarapim ol wok gavman bilong yu (Mista Marape) i mekim long tripela yia bilong gavman bilong yu. Tasol mi gat bilip long PANGU Pati na ol narapela ol arpela patna long dispela kolisen olsem na mi bai stap wantaim yu,” Mista Polye i tok.

Mista Polye i singaut long olgeta manmeri insait long kantri long putim tingting na bilip long dispela gavman bilong PANGU.