24 kendidet long Galp provins husat i resis long tripela sia bilong provins, i sainim wanpela petisen na givim long PNG Ilektoral Komisin long Mosbi long dispela wik Mande, Ogas 1. Ol i laik bai sampela senis i kamap bipo long kaunim i pinis na ol i tokaut long wina.

ILEKSEN PETISEN: Galf Rijonal kendidet, Dokta Seth Fose na Joe Ela wantaim kopi bilong petisen ol i givim long PNGEC long Mande long Mosbi. POTO: Lina Keapu.

Lina Keapu i raitim

24 kendidet namel 126 kendidet long Galp provins husat i resis long tripela sia bilong provins, i sainim wanpela petisen na givim long PNG Ilektoral Komisin long Mosbi long dispela wik Mande, Ogas 1.

As bilong dispela petisen em long senisim ol ilektoral opisal na ol manmeri husat i kaunim ol balot pepa long tripela sia: Kerema Open, Galp rijonal na Kikori Open.

Ol i lukim olsem ol PNGEC wokman long Kerema em ol lain husat i save stap wantaim sampela ol kendidet long bipo olsem na ol i gat bilip olsem i gat paul pasin i kamap.

Dokta Seth Fose, man i go pas long ol dispela petisen, i tok ol ilektoral opisal bilong provins i no mekim stret wok bilong ol.

Em i tok, ol skrutinia bilong ol i painim aut planti rong long balot bokis, balot pepa, na tu ol i no mekim toksave long ol pepa we ol i yusim na ol pepa we ol i yusim.

Em i tok ol wokman i no bihainim stret rot bilong kaunim we i toksave i save go pas long ol skrutinia long luksave gut pastaim long ol balot bokis na pepa bipo long kaunim i stat.

Dokta Fose i tok long dispela as na ol las balot bokis i stap yet, ol i laikim olsem ol Ilektoral opisal i mas stretim kaunim rum gut long ol skrutinia bilong ol kendidet bai ol i pilim orait long stap na lukim ol samting i kamap.

Na tu ol i mas wokim ol kwaliti sek bihain long wanwan kaunim bipo long ol i go long narapela kaunim.

“Wanem samting i kamap long taim bilong kempen, poling na kaunim em mipela i holim ol rekot bilong en i stap.

“Mipela bai kisim dispela i go long kot of disputed ritens bihain long ol i tokaut long husat i win.

“Mipla i gat inap samting i stap long soim kot olsem pasin korapsen i bin kamap long Galp provins, tasol nau yet larim kaun i gohet,” Dokta Fose i tok.

Narapela rijonel kendidet, Joe Ela i tok, “Mipela ol kendidet i makim maus bilong ol pipel long Galp provins long wanem mipela i laikim gutpela gavana bilong provins husat bai senisim provins.”

Mista Ela i tok, “Long dispela kaunim we man i holim sia i go pas, em i kirapim tingting bilong mipela olsem samting i no stret olsem na mipela i kamap wantaim dispela petisen.”

“Mipela i no wari husat i kamap gavana tasol wok bilong ol ilektoral komisin wokman i mas kamap stret long ol ileksen, Mista Ela i tok.”