Ol pati kamapim ol kem long redim ol yet long kamapim nupela gavman bilong 11 palamen, tasol senis i ken kamap taim ol i bung long namba wan taim long neks wik Tunde.

BIKPELA HAUS: Namba wan bung bilong 11 palamen bai kamap long Tunde, Ogas 9, 2022 long makim Spika na nupela gavman. POTO: File.

Senis save kamap long floa bilong palamen...

Andrew Molen i raitim

LONG Tunde neks wik bai Papua Niugini save long husat em i nupela praim minista long en, na husat ol lain i stap insait long gavman.

Nau yet, olgeta memba husat i winim pinis ileksen bilong ol, i stap nau long ol wanwan kem bilong ol.

Tupela bikpela kem em wanpela bilong PANGU Pati wantaim lida bilong ol, James Marape, na narapela em bilong People’s National Congress (PNC) Pati wantaim lida bilong ol, Peter O’Neill.

Mista Marape husat i bin praim minista long laspela palamen, i holim yet dispela wok bihain long em i winim bek sia bilong em long Tari-Pori open ilektoret.

Em i gat bilip long kamap praim minista gen taim palamen i bung namba wan taim bihain long dispela ileksen, long neks wik Tunde.

Dispela tingting i strong long Mista Marape long wanem, PANGU i gat moa long 20 memba, ol i pulim tu sapot bilong sampela ol memba bilong ol arapela pati na ol independen memba tu.

Tasol gavman i save kamap long floa bilong palamen tasol na i no long ol kem o narapela hap.

Long dispela as, sampela senis i ken kamap long Tunde neks wik taim palamen i vot long makim spika na praim minista.

Long dispela wik, ol PANGU i sainim wanpela MoU wantaim ol arapela pati husat i kem wantaim ol long Loloata ailan ausat long Sentral provins.

Mista Marape i tok bihain long dispela olsem sip bilong em i pulap nau na em i redi long ran.

“Mipela i redi nau na mipela i stat long toktok long ol samting mipela bai mekim long kantri,” Mista Marape i tok long ol nius ripot.

Long wankain taim, Mista O’Neill wantaim kem bilong em i stap redi long lukim wanem samting bai kamap long palamen long neks wik.

Long wanpela stetmen long Trinde dispela wik, Mista O’Neill i tok wok bilong praim minista em i no bilong em o Mista Marape tasol.

Em i tok ol narapela memba tu i mas traim long kisim dispela wok.

Mista O’Neill i tok ikonomi bilong kantri em i no stap gut na Mista Marape em i no rait man bilong holim dispela wok.

“Planti samting i no stap stret olsem na yumi mas kisim bek kantri bilong yumi,” Mista O’Neill i tok.