Memba bilong Tari-Pori na lida bilong PANGU Pati, James Marape i redi long kamapim nupela gavman wantaim ol memba bilong grup bilong em.

Andrew Molen i raitim

Memba bilong Tari-Pori na lida bilong PANGU Pati, James Marape i stap nau long kem long Wewak taun wantaim ol memba bilong grup bilong em.

Em i tok las wik olsem PANGU i redi long kamapim gavman bilong namba 11 palamen.

Mista Marape i tok tu olsem dua bilong ol i op long ol arapela memba bilong palamen na ol pati husat i laik joinim grup bilong em.

Nau yet PANGU i gat 27 memba pinis husat i winim sia bilong ol, People’s National Congress (PNC) Pati i stap namba tu wantaim 10 na United Resources Party (URP) i stap namba tri ples wantaim 9 memba.

Ol independen kendidet em 6-pela na National Alliance Pati em 5.

Social Democratic Party, PNG Party and People’s Party i wok long go pas nau long kaunim long tripela sia, People’s First Party, PPP, ULP na Triumph Heritage Empowerment (THE) Party, i wok long go pas long tupela sia long kaunim.

Sampela moa senis i kamap long dispela namba long taim dispela stori i kamaut.

Mista Marape husat i holim wok olsem PM yet inap long palamen i makim nupela gavman, i tok amamas long olgeta PANGU MP husat ol i winim bek ol sia ol i bin holim.

Em i tok dispela ol win i soim laik na bilip bilong ol pipel long ol dispela lida na i luk fowet long bungim ol na redim ol yet long kamapim gavman.

Mista Marape i tok kem bilong ol long Wewak em long luksave na soim rispek long papa bilong kantri, Sir Michael Somare husat i matmat bilong em i stap long hap.

“Long wankain taim, mipela bai no inap bung long toktok long gavman wok tasol, mipela bai lukluk bek long las 47 yia bilong kantri na rot we i kisim yumi kam olsem wanpela kantri,” Mista Marape i tok.

Sampela ol samting ol bai lukluk long en em strong bilong ikonomi bilong kantri na ol arapela wok bilong en, PNG Vision 2050, na tu long ol arapela gutpela samting we PANGU gavman i kamapim long las tripela yia.

I gat bilip olsem PNC pati bai mekim kem bilong ol long Kokopo long traim na bungim namba bilong ol tu long kamapim gavman.

Lida bilong pati, Peter O’Neill i bin tok las wik olsem ol bai bung long Mosbi tasol ol nius ripot long dispela wik i makim toktok bilong Memba bilong Pomio, Elias Kapavore, olsem ol bai bung long Kokopo.