Ilektoral Komisina, Simon Sinai i singaut long ol lain husat i wok long pait na bagarapim ol pipel na ol samting bilong gavman, long stopim dispela pasin na lusim wok bilong ileksen i go het.

STOPIM PAIT: Ilektoral Komisina bilong Papua Niugini, Simon Sinai. POTO: Andrew Molen.

Lina Keapu i raitim

Ilektoral Komisina bilong Papua Niugini, Simon Sinai i mekim wanpela strongpela singaut i go long ol lain husat i wok long bagarapim ol samting bilong gavman.

Em i tok klia olsem yumi ol manmeri gat 5-pela yia long mekim tingting bilong yumi long senisim ol lida sapos yumi lukim olsem ol i no mekim gut wok.

Dispela pasin nau i kamap long Enga Provins na Morobe we ol skrutinia na sapota bilong ol kendidet i kukim ol balot pepa, ol klasrum na pretim ol Ilektoral opisal, em i rong olgeta, na i mas stop.

Komisina Sinai i tok, ol manmeri mas i gat rait long vot long makim ol lida ol i laikim long en.

Mista Sinai i tok em i wok wantaim bos bilong Joint Sekyuriti Task Fos, Polis Komisina David Manning na ol arapela stekholda long lukim olsem ileksen i ran gut.

“I gat we bilong go agensim ol risal bilong ileksen sapos wanpela i ting olsem poling o kaunim i no go gut.

“Pasin bilong pait na bagarapim narapela man o ol samting em i rong olgeta,” Mista Sinai i tok.

Em i singaut long ol kendidet long rispektim ilektoral proses na tu noken bagarapim bel bilong ol sapota long pait.

Em tok i gat kot bilong ileksen i stap we ol i ken stretim, na i no long strit.

Mista Sinai i tok hevi bilong Markham na Kabwum ilektoret bai stap pastaim inap em i kisim wanpela ripot i kam long ileksen menesa bilong Morobe provins.

Long nau em i no inap wokim wanpela toktok yet.

Em i tok long taim poling i stat long Mande 4 Julai, i no gat planti hevi kamap na poling long planti hap i pinis nau na kaunim i wok long kamap.