Ol pipel long Markham distrik i kukim ol balot bokis na ples bilong kaunim, nau ol i wetim bekim bilong PNGEC long wanem samting bai kamap.

Ezekiel Lawrence i raitim

OL pipel bilong Markham distrik long Morobe provins i wetim disisen bilong Ilektoral Komisin long wanem tok em bai mekim long ileksen long ilektoret bilong ol.

Hevi i stat long Fonde, 14 Julai, long Mutzing stesin we ol i wok long kaunim ol balot pepa.

I gat tupela hap ol i kaunim balot pepa bilong tripela LLG insait long distrik.

Long Mutzing stesin yet, ol i kaunim ol bokis bilong Leron/Wantoat na Umi/Atzera LLG, na long Markham Valley Sekenderi skul, ol i kaunim bokis bilong Onga/Waffa LLG.

Long Fonde, ol skrutinia i komplen long Distrik Ritening Opisa, Willie Pilailo olsem namba bilong bokis 1 na 2 bilong Umi/Atzera i no stret wankain olsem rekot ol i gat long en.

Komplen i kamap tu long namba bilong Onga/Waffa, bihain long ol i pinisim olgeta kaun.

RO i pasim kaunim long dispela taim, na ol kendidet wantaim ol skrutinia bilong ol i raitim komplen leta long rausim RO na olgeta kaunim opisal, na makim nupela RO na ol nupela opisal.

Provinsol Ritening Opisa, Simon Soheke, i kisim dispela leta na em yet i go long distrik na toktok wantaim ol pipel na ol kendidet long go pas olsem ekting RO bilong distrik.

Long Sarere, 16 Julai, ol skrutinia na sapota bilong ol kendidet i kamapim bikpela hevi long distrik taim ol i brukim V-skrin we ol i save putim ol risal bilong kaunim long en, na ol i go brukim kontena na rausim olgeta balot bokis i kam ausait na kukim long paia wantaim olgeta balot pepa.

Ol i kukim tu wanpela trakta bilong distrik.

Bihain long en, ol i go insait long Markham Valley skul na bagarapim olgeta balot bokis na pepa bilong olgeta tripela LLG.

Bihainim wankain hevi long Markham, ol pipel long Kabwum distrik long Morobe provins tu i bagarapim ileksen wok long distrik bilong ol.

Ol i bagarapim kaunim senta, na kukim olgeta balot bokis na pepa.

Tupela polis kar tu i paia long dispela hevi.

Moa long en, wankain hevi tu i kamap long Kompiam-Ambum, Laiagam na Porgera/Pailea long Enga provins.

Dispela ileksen i bungim planti bikpela hevi long stat bilong en i kam.

Olgeta wok bilong ileksen i no pinis yet.

Planti manmeri i bungim hevi, sampela i dai long hevi na ol samting i i bagarap.

Papua Niugini i no save lukim dispela kain hevi insait long 46 krismas em i bin kisim independens.

Polis Kominsina, David Manning, i tok ol sekyuriti fos bai go long ol dispela hap we hevi i kamap long en na putim bek lo na oda.

Em i tok ol bai mekim wok painimaut long as bilong hevi na husat ol pipel i kamapim ol dispela hevi na bringim ol i go long lo.

Ilektoral Komisisna, Simon Sinai i singaut long olgeta kendidet long soim rispek long dispela ileksen na i no ken kirapim tingting bilong ol sapota bilong ol long kamapim hevi.