Laip bilong bebi Adrian i stap krangki nau bihain long ol polis i sutim mama bilong em i dai long ATS setelmen long wik i go pinis.

NO GAT MAMA: Presiden bilong HRDA-PNG, Misis Linda Tule wantaim bebi Adrian na sampela famili bilong em. POTO: Harlyne Joku.

LAIP bilong bebi Adrian i stap krangki nau bihain long ol i sutim mama bilong em i dai long ATS setelmen long wik i go pinis.

Mama bilong Adrian em Anaisa Max husat i bin dai taim wanpela pait i kamap namel long ol manmeri long ATS na polis long taim bilong vot bilong Mosbi Not Is Ilektoret long Julai 11.

I gat bilip olsem polis i bin sutim Mis Max tasol i no gat wanpela ripot i kamap yet long dispela.

Long Tunde dispela wik, ol famili na poro bilong Mis Max i go lukim Human Rights Defenders Association –PNG (HRDA-PNG) long kisim sampela stia tok na helpim long hevi bilong Adrian na dai bilong mama bilong em.

Ol i laikim helpim tu long lukautim Adrian husat i no gat mama nau.

PNG Ilektoral Komisin na polis i no go lukim ol o soim luksave long dispela hevi.

Bodi bilong Mis Max i stap nau long Pot Mosbi Jeneral haus sik (PMGH) na brata bilong em, husat i wanpela tasol, i raitim pas long PNGEC long helpim na salim bodi i go bek long ples bilong em long Jiwaka.Famili bilong Mis Max i toktok wantaim PNGEC long Tunde dispela wik tasol PNGEC i tok ol i wetim ripot bilong Polis Komisina, David Manning.

Presiden bilong HRD-PNG, Linda Tule i singaut long ol gavman atoriti olsem Department of Community Development na ol arapela, long helpim dispela pikinini.

Nau yet wanpela famili bilong em tasol em brata bilong mama bilong em wantaim meri bilong em, na ol poro bilong ol long komyuniti.

Misis Tule i tok opis bilong Human Rights Defenders i ken helpim ol long toktok na painim sapot bilong dispela pikinini tasol ol i no save painim o givim mani.

“Bebi Adrian i no gat mama nau long lukautim em na laikim em, em i mas kaikai na waswas, na putim gutpela klos.

“Em i no gat haus nau,” Misis Tule i tok.

Em i tok tu olsem mama bilong Adrian bai no inap dai sapos ol poling opisal na polis i bin bihainim gut wok bilong ol.

“Ol atoriti mas lukluk na stretim dispela hevi nau.

“Gavman i noken lusim i go tasol na lustingting long en.

“Em i wok bilong gavman nau long lukluk long hevi bilong dispela pikinini na stretim laip bilong em,” Misis Tule i tok.

Planti manmeri i bin lukim dispela hevi na sampela i kisim tu video we i soim husat i sut na kilim mama bilong Adrian.

Tasol nau yet i no gat wanpela toktok i kamap olsem ol i holim pinis husat i asua, na ol famili bilong Mis Max na bebi Adrian wantaim ol ATS komyuniti i wok long tingting planti long dispela.

Husat i laik helpim, i ken ringim Misis Joan Nul – makim famil long 71543443 na HRDA-PNG long 78763952.