Komanda Tondop i givim strongpela tok lukaut ol manmeri bilong tupela ples long Westen Hailans long ol i mas stopim pait.

LUKAUT: Sif Suprintenden Joseph Tondop i toktok long ol pipel long Mun, Dei distrik long Westen Hailans. Em i laik bai pait i mas pinis long dispela tupela ples. POTO: RPNGC.

DEPUTI Divisinel Polis Komanda bilong Hailans Is-end, Sif Suprintenden Joseph Tondop, i givim strongpela tok lukaut long ol Kimka na Rolgake wanpisin long Dei Distrik bilong Westen Hailans long dispela wik.

Em i tokim ol long soim rispek long agrimen ol i bin mekim long stopim pait.

Tondop i tok sapos tupela wanpisin i no harim tok na kamapim trabel gen, bai ol i kisim bikpela mekimsave long han bilong lo.

Mista Tondop i givim dispela tok lukaut long ol lida bilong tupela wanpisin long Mt Hagen Polis Stesin bihain long em i kisim ripot olsem ol tupela grup i stat long mekim nois gen.

Tondop i tok, “Yumi sainim agrimen bilong stopim pait. Tasol i gat ol kastom wok bilong stretim ol lain husat i bin dai, na bihain long dispel, bai yumi sainim wanpela pemenen bel isi agrimen.”

Em i tokim ol lida bilong tupela wanpisin olsem dispela agrimen i opim rot bilong statim wok long kamapim bel isi namel long tupela grup we bai i stap longpela taim.

“Planti manmeri i dai na ol propeti i bagarap. Mi sori long ol meri na pikinini husat i no gat ples long stap na i laik go bek long graun bilong ol, tasol rot i pas yet. Yupela i mas soim rispek long dispela agrimen na bihainim,” em i tok.

MistaTondop i tok ol Kimka wanpisin i muv i go bek long eria we pait i kamap long en na dispela i brukim agrimen ol i bin sainim.

“Olgeta Kimka husat i muv i go long dispela eria i mas lusim nau na ol lain Rolgaka i no ken kirapim pait. Nau em i no rait taim. Yumi wok long redi long kamapim fri, fea na seif ileksen long Dei distrik na Papua Niugini.”

MistaTondop i tokim ol tupela lain olsem long taim ileksen i pinis bai ol i statim totok bilong kamapim wanpela pemenen bel isi agrimen namel long ol tupela wanpisin.