Ol lida i mas go pas long soim gutpela pasin na we bilong mekim gut ol samting.

NOKEN BIHAINIM KORAPSEN: Cardinal Ribat i tok ol lida i mas go pas long soim gutpela na stretpela pasin stat long taim bilong ileksen yet.

Joseph Dawai i raitim

KORAPSEN i save stat pastaim wantaim ol lida olsem na dispela ileksen em i impoten tru long yumi olgeta manmeri.

Lida bilong Katolik sios, Sir John Cardinal Ribat i tok ol manmeri mas tingting gut pastaim long wanem lida ol i laik makim bipo long ol i votim ol.

Cardinal Ribat i tok planti kendidet i wok long givim mani na kago long ol vota long i go insait long palamen long helpim yumi long senisim laip bilong yumi.

“Sampela senis bilong ol i no save helpim yumi, na i save paulim ol bikpela wok bilong gavman i save laik kamap long helpim divelopmen bilong kantri.

“Olsem na ol pipel i mas tingting gut pastaim long ol i makim lida husat inap helpim ol, na bringim sevis i kam insait long komyuniti,” em i tok.

Em i tok planti ol kendidet i wok long givim mani na kaikai long ol manmeri, na ol pipel i wok long votim ol long mani na kaikai tasol.

“Yumi mas mekim disisen bilong yumi long makim kendidet husat i save pret long God, na em i save bihainim lo na helpim ol pipel.

“Dispela kendidet i mas i gat gutpela save na ekspiriens bilong wok insait long gavman, na em i man husat i ken wok wantaim ol komyuniti,” em i tok.

Cardinal Ribat i tok lida husat i ken i go bek long ples na i stap namel long ol pipel na luksave long hevi bilong ol.

“Ol intenesenel obseva nau i stap wantaim yumi na wanem kain pasin yumi wok long mekim bai kamap olsem nius nogut long ai bilong intenesenel komyuniti.

“Sapos ol politikal pati na kendidet i no soim lidasip na mekim nabaut bai yumi gat bikpela hevi, tasol sapos moa awenes i ken kamap long ol ileksen bilong bihaintaim, bai yumi inap makim lida we inap helpim kantri na yumi olgeta,” em i tok.

Cardinal Ribat i tok ol pipel i kisim bagarap long wanem ol lida i no pret long God, na i laik makim laik bilong ol tasol.