Planti hap long kantri i gat pait na hevi bilong ileksen i kamap, tasol long Is Nu Briten provins, ol i ranim ileksen bilong ol gut tasol.

Michael Novingu i raitim

Ol manmeri long Is Niu Briten provins i stat vot long las wik Mande i go inap long Fraide Julai 8.

Bosman bilong ilektoral Komisin long Kokopo, Joap VoiVoi i tok olsem ol balot bokis na ol samting bilong poling i bin go stap redi pinis long 4-pela distrik long provins.

Mista Voivoi i tok 135 tim i bin kisim ol dispela samting bilong vot long las wik na i go long ol hap bilong ol long statim vot las wik Mande.

Em i tok olsem ol lain i stap insait long ol rurel ples tu kisim ol dispela samting na ol i go karimaut wok bilong vot long hap bilong ol.

Mista Voivoi i tok olsem ol kendidet wantaim ol skrutinia bilong ol i stap long polis stesen long Kokopo, Rabaul, Gesel na Pomio i witnesim ol balot bokis, na ol pepa bilong vot ol polis wantaim ol woklain bilong ilektral komisen i kisim i go long ol hap bilong vot.

Em i tok poling i stat orait tasol na i no gat hevi bin kamap, moyet em i tokim ol woklain bilong ilektral komisin long wok wantaim taim long wanem vot i ran wanpela wik.

Em i tok ol i bin stretim olgeta komon rol bilong ol pinis na ol manmeri bin kamap redi tasol long vot.

Mista Voivoi i tok husat ol i no bin gat nem long komon rol, ol woklain i kisim nem bilong ol bilong ol long vot long bihain taim.

Em i tok bihain long vot olgeta bokis i go stap lok long ol polis stesin long wanwan distrik bilong ol.

Mista Voivoi i tok long ENB i gat 174,000 manmeri husat nem bilong ol i stap long komon rol, i vot long 2022 nesenel jeneral ileksen.

Kokopo distrik i gat  moa long 49,000 manmeri husat i vot, Pomio distrik em 33,000, Rabaul 23,000, na Gesel i lukim moa long 67,000 manmeri vot.

Ripot i kam long ol distrik i tok vot long ol distrik i kamap orait tasol.