Poling i no kamap long taim na i no bihainim ol samting we em i sapos long bihainim, na dispela i mekim ol kendidet i no amamas long ol ileksen menesa bilong ol dispela ilektoret.

REDI LONG VOT: Ol balot bokis i stap redi long Sir John Guise stadium long Mosbi redi long poling i kamap.

Carolyne Ketsimur i raitim

POLING bilong Mosbi Not Is i no bin kamap olsem hau em i mas kamap.

Na dispela i bin kamapim bikpela bel hevi tru long ol kendidet bilong Mosbi Not Is na NCD rijinal.

Poling i bin surik long 4-pela taim long las wik. Na dispela i no stret long ai bilong ol.

Ilektoral Komisen i no bihainim konstitusinel lo bilong kantri.

Las wik Fraide, ol vota bilong Mosbi Not Is i no bin vot wantaim ol narapela ilektoret long wanem ol balot bokis i no bin redi long go aut long ol poling senta.

Ol vota i bin kamap long ol poling senta long moning tru wantaim tingting bilong putim mak bilong ol long ol kendidet ol i laikim.

Tasol ol i mas wet inap long samting olsem 7 aua long kisim klia toktok long Ilektoral Komisin long taim bilong vot.

Na dispela em i no stret long ol.

Ol kendidet bilong Mosbi Not Is i bin kamap long Sir John Guise Stadium long autim bel hevi bilong ol i go long Ileksen Menesa bilong NCD, Kila Ralai olsem em i no fit long ranim dispela ieksen na em i mas lusim wok.

Taim poling  bilong ol narapela ilektoret i bin wok long kamap, ol opisal bilong Ilektoral Komisin i bin wok long stretim yet ol balot bokis bilong Mosbi Not Is.

Dispela i soim olsem Ileksen Menesa i no bin plenim dispela ileksen gut, na em i no fit long ranim na menesim.

Ol kendidet na ol pipel i askim em long lusim posisen bilong em olsem Ileksen Menesa na larim Ritening Opisa, Billy George husat i bin risain long Fraide moning, long kam bek na ranim Ileksen.

Ol kendidet i tok ol i trastim Ritening Opisa, Billy George long ranim Ileksen na askim strong tru Ileksen Menesa, Kila Ralai long risain.

Long bekim toktok bilong ol kendidet, Mista Ralai i tok em bai lusim wok olsem Ileksen Menesa na larim narapela i ranim ileksen.