Memba bilong Not Bogenvil, William Nakin i lusim laip bilong em long Tunde avinun dispela wik long Pot Mosbi Jeneral Haus sik. Em i dai taim ol pipel bilong Bogenvil i wok long vot yet wantaim ol arapela ples insait long kantri.

LUSIM LAIP: Mista Nakin i dai long PMGH dispela wik taim ileksen i wok long ran yet insait long Bogenvil na kantri. POTO: NA Party.

SITING Memba bilong Not Bogenvil, Hon William Nakin i lusim laip long Tunde avinun long Pot Mosbi Jeneral Haus sik.

Em i dai taim ol pipel bilong Bogenvil i wok long vot yet.

Mista Nakin i bin kisim strok long Buka na kwiktaim tru ol i kisim em i go long Pot Mosbi long Mande 11, 2022.

Tasol haus sik i no inap helpim em.

Siting Rijonal memba bilong Bogenvil, Peter Tsiamalili Jnr,  wantaim Siting Memba bilong Saut Bogenvil i givim bikpela tok sori bilong ol i go long famili bilong William Nakin na ol pipel bilong Gogohe na Not Bogenvil.

Long wankain taim, Lida bilong National Alliance Pati i tok sori tru long dai bilong memba bilong Not Bogenvil.

Em i tok William Nakin em gutpela lida wantaim daun pasin. Na NA pati bai misim dispela gutpela pasin bilong em.

Mista Pruaitch i tok  Nakin i bin mekim gutpela wok long bringim sevis olsem haus sik, skul na sanapim ol komyuniti senta long Not Bogenvil stat long taim em i bin kisim dispela sia long 2017.

Makim famili bilong em, ol pipel bilong Aitape- Lumi na NA pati, Mista Pruaitch i givim bikpela tok sori i go long famili bilong William Nakin na ol pipel bilong Not Bogenvil.