Dispela ileksen i lukim planti senis i wok long kamap long taim bilong vot, na planti manmeri no amamas long dispela.

Joseph Dawai i raitim

PLANTI pipel insait long NCD i ting olsem pasin bilong senisim det bilong vot inap givim hevi long ol wokmanmeri na ol bisnis haus husat i save mekim wok long helpim famili bilong ol.

Komyuniti lida bilong Badili, Mista Ray Kopi i tok ol pipel i save pinis long wanem samting i save kamap long taim bilong ileksen olsem na ol ileksen opisal i no ken giaman na surukim det bilong vot. 

Mista Kopi i tok i gat tupela astingting NCD ileksen menesa, Mista Kila Ralai i bin tokaut long em i no stret na planti ol pipel na sapota bilong ol kendidet i no amamas.

Namba wan samting,em i tok em olsem; “ol sapota bilong ol kendidet i wok long pasim rot bilong proses bilong ileksen na narapela samting em, long trening bilong ol skrutinia na ileksen opisol bilong Mosbi Not Is open ilektoret i no bin kamap.”

“Dispela ol tingting em i giaman toktok tasol, na i no gat gutpela astingting long surukim det bilong vot i go bek long las wik Fraide na Mande long dispela wik,” em i tok.

Long pastaim i bin i gat sampela giaman pasin kamap, na dispela ol kain tingting i stap wantaim planti pipel long taim bilong 2022 Nesenel Jeneral Ileksen (NGE).

Mista Kopi husat i bin ritening opisa bipo, i tok long las 2017 NGE, ol polis i no bin larim ol skrutinia long bihainim balot bokis, na ol polis yet i bin kisim balot bokis long Don Bosco i go long Badili Polis stesen we em i no gutpela.

Em i tok olgeta taim balot bokis i stap we ol skrutinia i mas stap wantaim i go inap long kaunting i pinis na tu ol i gat olgeta rait long askim ol ileksen opisal wanem samting ol i wok long mekim.

“Planti ol kendidet i save givim mani long ol ileksen opisal long mekim paul pasin na ol dispela samting i bin kamap bipo, na ol pastaim ileksen opisal i save long dispela kain pasin olsem na ol i no mekim tok giaman long karamapim hait tingting,” Mista Kopi i tok.