Ilektoral Komisina bilong Papua Niugini, Simon Sinai i tok hevi bilong dispela meri husat ol i tok polis i bin sutim i dai long Mande dispela wik long ATS blok long Mosbi, em i no asua bilong PNG Ilektoral Komisin. Dispela hevi i stap long han bilong ol polis nau.

NO GAT ASUA: Mista Sinai i tok ol polis bai lukuk long hevi bilong dispela meri husat i sai long ATS blok. POTO: Andrew Molen.

Andrew Molen i raitim

Ilektoral Komisina bilong PNG, Simon Sinai i tok hevi bilong dispela meri husat ol i tok polis i bin sutim i dai long Mande dispela wik long ATS blok long Mosbi, em i stap long han bilong polis nau.

Mista Sinai i tok dispela hevi i kamap long taim bilong poling tasol em i wok bilong ol polis na sekyuriti fos long stretim ol kain hevi olsem.

Long wankain taim, wok painim aut long dispela hevi i wok long kamap nau.

Ol famili bilong dispela meri i singaut long PNG Ilektoral Komisin (PNGEC) long helpim ol long salim bodi bilong em i go bek long ples bilong em long Jiwaka.

Mista Sinai i tok dispela bai no inap kamap long wanem dispela meri i no wanpela poling opisal o wokmeri bilong PNGEC.

Tasol em i tok sori olsem dispela hevi i kamap na i singaut long ol manmeri long wokbung wantaim ol ileksen opisal na ol sekyuriti fos long abrusim moa birua, na lukim ileksen i kamap gut.