OL brata bilong meri husat ol i bagarapim na kilim long saspek long soseri i stap we? Em askim ol tripela meri lida long Pot Mosbi i askim.

Ol tripela meri  Dame Carol Kidu DBE, Dame Meg Taylor DBE na Dame Jean Kekedo DBE i tok ol i wari tru long dispela pasin bilong soseri akyusesen rileted vailens (SARV) long ol meri we i wok long kamap olgeta taim. Ol tripela Dame i mekim dispela tok bihain long ol media ripot we i soim vailens bilong soseri saspek na sutim tok em we i kamap wanpela bikpela wari tru. “Dispela em i no namba wan taim dispela kain vailens i kamap na bai em i no las inap gavman i kisim dispela hevi na mekim olsem hevi bilong en na kisim eksen long olgeta level bilong gavman na sosaiti. “Mipela i luksave olsem soseri em i bikpela hevi tru long kantri na em i afektim ol man na meri wantaim, tasol pasin bilong kamapim vailens long ol meri em i kamap bikpela wari.” Ol i tok i gat sampela wok i kamap pinis long polisi na lejislesen long adresim vailens bilong sutim tok long soseri tasol ol i wari yet olsem inap sampela eksen tru i kamap long putim risos na ol releven ejensi na franlain risponda, PNG bai i lukim yet ol meri i lusim laip bilong ol.Ol i luksave long bikpela wok ol lokal human rait difenda na edvoket i wokim na ol i tok strong long ol releven gavman ejensi na lokal lida long wok wantaim ol komyuniti netwok na strongim ol long wanem ol sut toktok long soseri i save kamap insait long famili na komyuniti.“Mipela i laik tok gen long ol man long kantri bilong mipela long wok bilong ol pikinini man, brata, kandre, papa long was na banisim ol susa na mama long taim bilong birua na mipela i askim, “Ol brata bilong ol dispela meri husat i kisim bagarap na indai i stap we ?” Ol tripela Dame i luksave tu long bikpela wok sampela bikpela sios i karimaut long edvoket egensim na banisim ol meri husat i kisim bagarap na lusim laip bilong ol long vailens bilong soseri akyusesen na mipela i singaut long ol sios long komitim ol yet long Nesenel Sios Strateji long adresim vailens bilong soseri akyusesen. Ol i laik lukim ol sios i mas tokaut moa egensim dispela ol hevi. “Mipela i singaut long olgeta pipel bilong Papua Niugini long tokaut egensim soseri akyusesen vailens. Mipela i singaut tu long gavman i mas kisim eksen long lukim olsem polis na ol arapela ki franlain ejensi i gat inap risos long banisim soseri vailens. “Mipela i askim tu olsem wanpela kantri mipela i mas sapotim wok bilong ol grasrut human rait difenda husat i stap long franlain  long mekim wok edvokesi, helpim na bringim ol lain i kisim bagarap long vailens i go kisim helpim.