UPNG Jenelis Sumatin Martha Mora Bokowi i raitim GAVANA bilong Nesenel Kapitel Distrik (NCD) Powes Parkop i no amamas long soseri vailens egensim ol faivpela meri long Sauten Hailens na Enga Provins na em i singaut olsem i mas i gat spesel unit  long polis long mekimsave long ol man husat save kamapim vailens egensim meri.

Em i bin mekim dispela tok long wanpela video konprens long de bipo long nupela yia. Em i tok, “Ol meri long dispela kantri i save kisim bikpela bagarap long soseri vailens.” Gavana Parkop i tok inap long  toktok na eksen mas kamap long stopim Jenda Bes Vailens (GBV). “Mi laik singaut long Gavman, Polis Komisina na ol Sios lida long kirap na mekim eksen long stopim dispela kain pasin bilong bagarapim ol meri,” Gavana Parkop i tok. I mas gat spesel polis yunit na tim bilong mekimsave long ol man husat save bagarapim ol meri long GBV. “Yumi no ken lukluk na toktok eksen mas kamap long stopim dispela kain pasim,” Gavana Parkop i tok. Gavana Parkop em i memba bilong Spesel Palamen Komiti long Jenda Bes Vailens we i bin kamap las yia.