James G. Kila i raitim KONSTRAKSEN wok i go het yet long wokim nupela Usino-Bundi distrik opis long Walium.

Dispela nupela opis i luk gut na bai i kamap olsem wanpela nupela moden bilding na nupela kain divelopmen long dispela rurel distrik long Madang provins. Nupela distrik opis kompleks bilong Usino-Bundi na Gama distrik long Walium i kost samting olsem K2.5 milien. Mani long kamapim dispela wok em i kam long Usino-Bundi Distrik Divelopmen Atoriti (DDA) na arapela helpim olsem K250,000 i kam long Nesenel Geming Bod wantaim helpim bilong Praim Minista, James Marape. Dispela nupela opis kompleks long Walium bai wanpela dabol stori bilding we insait long em bai i gat 22 opis spes na bai i gat wanpela bikpela konprens rum, opis bilong Distrik Edministreta (DA) bai stap insait long en, Treseri opis, opis bilong ol narapela sekta na opis bilong MP na ol ablusen blok o ples bilong waswas na toilet i stap insait long em. Tude Usino-Bundi distrik i go pas long wok bilong sevis deliveri long Madang provins na i sanap namba tri long PNG. Dispela em wanpela impekt projek tru we Uguro, husat i go pas long em. Minista Uguro i tokaut olsem kampani husat i wokim wok long nupela opis kompleks em 3 De Intenesenel na ol i wok stap long Madang yet. Uguro i tok olpela opis bilding i luk olsem wanpela gest haus.Olsem na senis i mas kamap long en long soim olsem UsinoBundi na Gama distrik i senis na kamap gutpela na lukim gutpela divelopmen i kamap long senisim laipstail bilong ol pipel. “Mipela i laik muv i go longwe long gest haus opis i go long stetov-da art Kompleks,” Uguro i tok. “Mipela i laik muv go aut long hap taim laipstail i go long laipstail i strong na stap longpela taim.”