OL JENERAL Memba i ranim politikal pati, i no ol pati eksektiv, Dokta Alphonse Gelu, Dairekta bilong Opis bilong Integral Pati na Kendidet (OLIPPAC) i tok.

Em i tok ol eksetiv o palamentari lida i no ken ting em i ranim kantri. Em i mekim dispela tok long Nesenel Risets Institut (NRI) bung em institut i wok long holim ol semina long ol politikal pati i kamap na tokaut long polisi bilong ol long las Desemba i kam nau long nupela yia. Em i tok ol memba i papa bilong pati husat i kamapim pati. “Dispela em i bikpela paul tingting. Ol Memba bilong Palamen i ken kam na go o ol eksekyutiv i ken kam na go tasol pati bai stap,” Dotka Gelu i tok. “Ol ekseketiv i no ken ting ol i papa bilong pati, nogat. Nau yet i gat inap olsem 44 pati husat i rejista. Em i tok pati polisi tu i  bikpela samting. Em i tok polisi bai gaidim pati long mekim wok bilong en. Em i askim ol vota olsem long Julai, 2022 Jeneral Ileksen, ol manmeri i mas votim ol kendidet bilong ol pati we i gat ol gutpela polisi bilong wok divelopmen. Em i tok tu olsem dispela tok, Save long Pati bilong Yu na Votim Pati bilong yu i mas go pas taim manmeri i vot. Em i askim ol pati long go aut na tokaut long polisi bilong ol. Em i givim tok piksa long Pipels Nesenel Kongres (PNC) pati we i kempen long fri edukesen polisi bipo long 2012 na 2017 Nesenel Ileksen we taim PNC i win i karimaut dispela polisi. Em i tok nau yet planti manmeri sapos ol i skul sumatin o stap long ples, ol i no save gut long wan wan ol pati na ol kendidet i makim dispela ol pati. Long dispela Dokta Alphonse Gelu wantaim tim bilong em i bin karimaut sampela sevei long Kerema, Galp na Milen Be Provins i bin painimaut olsem ol manmeri i no wari ol i save long pati o no gat, bikpela samting em ol i votim kendidet ol i laikim. Em i askim manmeri long sensim dispela tingting na votim ol kendidet bihainim ol pati polisi bilong ol.