OL pipel i gat rait long votim ol lida long laik bilong ol na dispela bai kamap sapos ol i fri long vot long laik bilong ol yet, na i no mas gat pasin bilong korapsen na pasin giaman bilong  paulim ol balet  pepa.

Presiden bilong Katolik Profesenel Sosaiti bilong Papua Niugini, Paul Harricknen i bin mekim dispela singaut i go long gavman long dispela wik. Mista Harricknen i tok sampela vota i no save fri long makim ol lida long wanem ol wasman i save lukluk na givim mani long vot long ol kendidet. “Na em tru tu olsem ol ilektoral opisal na sekyuriti opisa i save mekim pasin giaman long paulim ol balot pepa,” Mista Harricknen i tok. Em i tok dispela ileksen i no ken kamap wankain olsem ol arapela ileksen. “Long 2012 na 2017 nesenel jeneral ileksen i no bin kamap gut na sapos gavman i laikim gutpela lida long palamen em i mas mekim kamap fri na fea ileksen,” Mista Harricknen i tok. Mista Harricknen i tok tu olsem COVID-19 em i narapela salens tu gavman i mas tingim na katim daun kempen long 6 wik i go daun long foapela wik. “Kempen wik i mas sot long stopim COVID-19 i kamap bikpela na tu daunim sans bilong korapsen i kamap,” Mista Harricknen i tok.

UPNG Jenelis Sumatin Martha Mora Bokowi i raitim