LONG pinis bilong mun Desemba, yumi olgeta i bin kirap nogut long lukim ol piksa bilong wanpela samting i bin kamap sampela wik i go pinis long ples Sumi long Kagua distrik, Sauten Hailans.

Ol pipel i bin sutim tok long faivpela meri i wokim posin na kilim wanpela yangpela man. Orait ol i kalabusim ol dispela meri na givim bikpela pen long ol, faivpela i dai na tupela i kisim bikpela bagarap tru. Sapos soseri i tru o i no tru, em i gat longpela histori bilong en. Long pas St Paul i raitim i go long ol Galesia em i tok:“Yupela i save pinis long pasin bilong olpela bel. Em olkain pasin olsem, pasin pamuk na pasin doti na pasin bilong bel i kirap long mekim pasin nogut, na pasin bilong lotu long ol giaman god na pasin bilong mekim olkain posin na pasin birua na belhat na kros na bel nogut na mangal na pasin bilong ting long yu yet tasol na tok pait na brukim lain, na pasin bilong bel kaskas long ol man i stap gut na pasin bilong spak na hambak na singaut bikmaus nabaut na ol kain pasin olsem. Bipo mi tokim yupela pinis, na nau mi mekim wankain tok gen. Olgeta man i mekim dispela kain pasin, ol bai i no inap go insait long kingdom bilong God.”(Galesia 5:19-21.) St Paul i bin givim strongpela tok lukaut tasol em i no tokim ol pipel long kilim ol lain i mekim ol dispela kain pasin nogut. Em i no laik pasin bilong sutim tok nating. Kontribusen bilong Sios long sosaiti em i klia. I no gat wanpela samting i ken sapotim o strongim pasin bilong soseri. Pasin bilong tok olsem man i gat pawa bilong wokim soseri o pasin bilong sutim tok nating na yusim vailens long ol, em i pasin nogut tru. Ol stadi, edukesen na awenes long soseri i helpim ol manmeri long luksave long dispela hevi na painim ol rot bilong daunim. Tasol, video bilong dispela pasin i bin kamap long Sauten Hailans long mun Novemba i soim ples klia olsem nau em i taim bilong pait strong egensim dispela pasin nogut bilong soseri akyusesen riletet vailens. Yumi ken winim dispela pasin nogut na rausim olgeta. Dispela hevi bai i no inap pinis sapos yumi helpim tasol ol viktim na ol manmeri bilong wokim soseri na ol lain i givim pen ol kilim ol meri. Lo i mas i givim strongpela mekimsave tru long ol lain i mekim dispela pasin nogut long stopim wankain pasin olsem i kamap gen. Ol i mas sanap long ai bilong kot (ol kot tasol) sapos ol i tok ol i gat pawa bilong wokim soseri; na lo i mas protektim ol manmeri ol arapela i sutim tok nating long ol long dringim blut o kaikai lewa o ol kain giaman toktok olsem. “I mas gat moa wok i kamap long stopim ol dispela pasin nogut. Namba wan em long stopim dispela pasin bilong givim pen na kilim ol meri. Sosaiti husat i save kilim ol mama bai i pundaun!”, Bisop Donald Lippert bilong Mendi i tok. Daiosis bilong em i go pas long pait egensim soseri akyusesen riletet vailens. Ol lain husat i save yusim dispela sans na ol glasman na mambuman em strongpela lo na ol polis i mas mekimsave long ol. Ol tarangu viktim bilong ol i no wokim soseri na i kisim nating pen na dai. Katolik Bisop Konprens bilong PNG na Solomon Ailan wantaim olgeta lokal peris na daiosis na ol arapela lain husat i mekim wok nau, bai i strongim pait egensim soseri akyusesen riletet vailens. Yumi no ken lukluk tasol na wanpela moa viktim gen i dai!

Fr Giorgio Licini Seketeri CBC